Франция Ташқи ишлар вазирлиги Ғазо секторидаги тўйиб овқатланмаслик ва “очлик хавфи” Исроил томонидан ўрнатилган қамалнинг бевосита оқибати эканлигини маълум қилди. Бу ҳақда минтақадаги инсонпарварлик вазияти ёмонлашганига изоҳ берган вазирлик расмий вакили хабар берди.
“Франция Исроилнинг Ғазо марказига ҳужумини кенгайтиришини қатъиян қоралайди. У ердаги кўчириш буйруқлари Дейр ал-Балаҳ шаҳрида ўн минглаб одамларнинг бошпанасиз қолишига олиб келди. Янги ҳарбий амалиёт тўйиб овқатланмаслик ва очлик хавфи билан тавсифланаётган инсонпарварлик вазиятининг ёмонлашишини тезлаштирмоқда”, дея таъкидлади вазирлик вакили.
Унинг сўзларига кўра, жорий ҳафтада Исроилнинг Ғазодаги ҳарбий ҳаракатларининг кучайиши маҳаллий аҳолининг аҳволини кескин ёмонлаштирмоқда. Фаластин ҳудудида ўрнатилган инсонпарварлик қамали эса озиқ-овқат билан боғлиқ жиддий муаммоларга ва оммавий очлик хавфига сабаб бўлмоқда.
Франция ҳукумати Ғазодаги фожиали инсонпарварлик вазиятидан ташвишга тушиб, Исроил томонидан жорий этилган чекловлар инқирознинг асосий сабаби эканини таъкидламоқда. Вазирлик аҳоли турмуш шароитининг яна-да ёмонлашишига йўл қўймаслик учун зудлик билан чоралар кўришга чақирди.
“Ушбу аҳвол Исроил томонидан ўрнатилган қамал натижасида юзага келган. Франция Исроилнинг Ғазода инсонпарварлик ёрдами олишга уринаётган фаластинликларни ўққа тутишини қатъиян қоралайди. БМТ маълумотларига кўра, сўнгги икки ой ичида мингдан ортиқ одам ҳалок бўлган”, дея таъкидлайди вазирлик вакили.
Франция ТИВ масъули Париж вазиятдан келиб чиқиб қандай аниқ қадамлар қўймоқчи эканига ойдинлик киритмаган, бироқ қамал туфайли юзага келган муаммони ҳал қилиш зарурлигини алоҳида таъкидлаган.
Июль ойи бошида Франция президенти Эммануэл Макрон Буюк Британияга уч кунлик давлат ташрифи чоғида Британия парламентида сўзлаган нутқида Фаластин давлатини тан олишга чақирди ва Ғазодаги урушни “чексиз ва стратегик мақсадсиз” деб атади.
“Сиёсий ечим - тинчликка олиб борадиган ягона йўл ва мен Фаластин давлатининг тан олинишига ишонаман”дея таъкидлади Макрон.
Изоҳ (0)