O‘zbekistonda yil boshidan beri o‘n mingdan ortiq xodimning 130 mlrd so‘mga yaqin maoshi undirib berildi. Bu haqda Kambag‘allikni qisqartirish va bandlik vazirligi xabar berdi.
Qayd etilishicha, Kambag‘allikni qisqartirish va bandlik vazirligi Davlat mehnat inspeksiyasi mehnat va mehnatni muhofaza qilish qonunchiligiga rioya etilishi ustidan davlat nazoratini hamda tekshiruvini amalga oshiradi.
Joriy yilning birinchi yarmida inspeksiya tomonidan o‘tkazilgan nazorat tadbirlari davomida 10 501 nafar xodimning 129 mlrd 769 mln so‘m oylik ish haqi va unga tenglashtirilgan to‘lovlari undirib berildi.
- Shundan:
109 mlrd 106 mln so‘m Davlat mehnat inspektorlari aralashuvi bilan undirilgan. - 20 mlrd 663 mln so‘m sud orqali undirilgan.
Keltirilishicha, bular orasida yirik ish beruvchilar ham, kichik va o‘rta biznes subyektlari ham mavjud.
Mehnat huquqi bo‘yicha mutaxassis Saidali Muxtoraliyev endi davlat fuqarolik xizmatchisini noqonuniy bo‘shatish rahbarga juda qimmatga tushishini ma’lum qilgandi. Huquqshunosning tushuntirishicha, “Davlat fuqarolik xizmati to‘g‘risida”gi qonunning 51-moddasida (davlat fuqarolik xizmatchisi faoliyatining qonunga xilof ravishda tugatilishi oqibatlari) shunday deyilgan:
➖ Davlat fuqarolik xizmati lavozimiga tiklangan davlat fuqarolik xizmatchisiga uning faoliyati qonunga xilof ravishda tugatilgani tufayli yetkazilgan zararning o‘rni O‘zbekiston Respublikasi Davlat byudjeti mablag‘lari hisobidan qoplanadi.
➖ Davlat fuqarolik xizmatchisi faoliyatining qonunga xilof ravishda tugatilishida aybdor bo‘lgan shaxs qonunda belgilangan tartibda javobgar bo‘ladi. Davlat fuqarolik xizmatchisi faoliyatining qonunga xilof ravishda tugatilishi bilan bog‘liq zararning miqdori aybdor shaxsdan regress tartibida undiriladi.
Bu normalar faol holatga kirgan ekan, endi noqonuniy bo‘shatishlar natijasida davlat organlaridan undirilgan summalar birma-bir sarhisob qilinadi. Byudjetdan undirilgan har bir so‘m va har bir tiyin aybdor shaxslarning cho‘ntagidan regress tartibda qayta undirib olinadi, dedi huquqshunos.
Izoh (0)