“Barselona” klubi 17 yoshli Lamin Yamal bilan yangi shartnoma bo‘yicha kelishib oldi. Bu haqda taniqli insayder Nikolo Skira xabar bermoqda.
Manbaga ko‘ra, ispaniyalik futbolchi kataloniyaliklar bilan 2030-yil yozigacha mo‘ljallangan bitim imzolaydi. Shartnoma moliyaviy jihatdan ham ancha yaxshilangan: Skira ma’lumotiga ko‘ra, Yamalning yillik maoshi 9 million yevroni tashkil etadi va bu ko‘rsatkich har yili oshib boradi va uning yillik ish haqi 18 million yevrogacha yetishi kutilmoqda. U “Barsa”da de Yong va Levandovskidan keyin eng ko‘p maosh oladigan futbolchilar uchligiga kiradi.
Avvalroq kataloniyaliklar futbolchi 18 yoshga to‘lgan kuni yangi shartnoma imzolashi haqida xabarlar tarqalgan edi. Shuningdek, o‘sha kuni Laminga 10-raqam ham berilishi aytilgandi.
Yamal 2024/25 yilgi mavsumda ajoyib statistikani qayd etdi: u 54 ta o‘yinda maydonga tushib, o‘z hisobiga 18 ta gol va 21 ta golli uzatma yozdirib qo‘ygan. Uning hozirgi shartnomasi 2026-yilning yoziga qadar amal qiladi. Transfermarkt portali Yamalning qiymatini 180 millon yevroga baholagan.
Izoh (0)