Ukraina uch yildan ortiq davom etgan urushdan keyin tiklash xarajatlarini 14 yil davomida 850 milliard yevroga baholadi. Bu haqda mamlakat bosh vaziri Denis Shmigal xabar berdi.
Bosh vazir bunday bahoni Rimda bo‘lib o‘tayotgan Ukrainani tiklash bo‘yicha konferensiyada ma‘lum qilgan. Ukraina prezidenti Vladimir Zelenskiyning shaxsan o‘zi Rimga kelgan.
Bizning konsepsiyamiz umumiy hajmi bir trillion AQSH dollari bo‘lgan ikkita jamg‘arma tashkil etishni nazarda tutadi, degan Shmigal.
Birinchi jamg‘arma Kiyev nazoratida bo‘lgan “Ukraina jamg‘armasi” bo‘ladi. U xorijda musodara qilingan 460 milliard yevrodan ortiq Rossiya aktivlari, shuningdek, Rossiya xomashyosi eksportiga qo‘yiladigan maxsus soliq hisobidan moliyalashtirilishi rejalashtirilgan.
Qariyb 400 milliard yevrolik ikkinchi jamg‘arma xususiy investitsiyalar hisobidan shakllantiriladi. Shmigal, shuningdek, ittifoqchilarni 2026 va 2027-yillarda Ukraina byudjeti taqchilligini qoplash uchun qo‘shimcha moliyaviy mablag‘ ajratishga chaqirgan.
Harbiy xarajatlar hozir 100-120 milliard dollarni tashkil qilmoqda. Tinchlik sharoitida va qurol ishlab chiqarishni hisobga olmaganda, Ukraina qo‘shinlarini saqlash yiliga 50 milliard yevroga tushadi. Bu summaning yarmini Yevroittifoq ta’minlaydi, deb hisoblaymiz, degan bosh vazir.
Izoh (0)