“Kalmar o‘yini” serialining uchinchi fasli 27-iyun kuni Netflix’da namoyish etildi va avvalgi mavsumlarga qaraganda yanada dahshatli voqealarga to‘la bo‘ldi. Stress, xavotir va zo‘ravonlikka to‘la bu mavsumda Gollivud aktrisasi Keyt Blanshettning chiqishi kutilmagan holat bo‘ldi. Ammo mashhur aktrisa ishtirok etgan sahnada tomoshabinlar noodatiy bir tafsilotni payqashdi.
Gap shundaki, o‘yin boshqaruvchisi (Li Byon Xon) va yollovchi ayol (Keyt Blanshett) bilan uchrashadigan sahnada bir xil odamlar ikki bor kadrlarda ko‘rinadi. Dastlab boshqaruvchi yetib kelayotganida kulrang sviter va qora ryukzakdagi erkak, undan keyin esa ko‘k jemper kiygan ayol kadrdan o‘tib ketadi.
Biroq aynan o‘sha sahnaning davomida, ya’ni boshqaruvchi qaytib ketayotgan paytda, xuddi shu ikki odam avvalgi yo‘nalishda yana bir bor ko‘rinadi.
Bu holat bo‘yicha tomoshabinlar turlicha fikr bildirdi: ayrimlar buni oddiy montaj xatoligi yoki epizodik aktyorlar yetishmagani deb hisoblamoqda. Boshqalar esa bu tafsilot “Kalmar o‘yini”dagi olamning davriyligi, ya’ni takrorlanuvchi tabiatga ega ekaniga ishora bo‘lishi mumkin, degan fikrda.
Ma’lumot o‘rnida: Netflix’ning mashhur seriali “Kalmar o‘yini”ning yakuniy uchinchi mavsumi katta shov-shuv bilan taqdim etildi. Premyeradan so‘ng atigi uch kun ichida yangi fasl 60,1 million marta tomosha qilindi. Bu ko‘rsatkich uni qisqa muddat ichida eng ko‘p ko‘rilgan serialga aylantirdi.
Serialning ikkinchi mavsumi ham o‘z vaqtida yuqori natijalarga erishgan — premyeradan keyingi dastlabki to‘rt kun ichida 68 million marta ko‘rilgan va ilk haftasidayoq reytingda birinchi o‘ringa chiqqan. Bu natija hatto ilgari yetakchilik qilgan “Uenzdey” serialidan (50,1 million ko‘rish) ham yuqori bo‘lgan edi.
Uchinchi fasl syujeti bosh qahramon Son Ki Xun atrofida davom etadi. U yana shafqatsiz o‘yinga aralashishga majbur bo‘ladi. Biroq bu safar uning maqsadi faqat tirik qolish emas, balki o‘yin tizimiga qarshi kurashish, qoidalarni o‘zgartirish va insoniylik hali yo‘qolmaganini isbotlash bo‘ladi.
Izoh (0)