Turk aktyor va aktrisalari shaxsiy hayotida ro‘y berayotgan yangiliklar va so‘nggi kunlarda yulduzlar nimalar bilan band ekani haqidagi ma’lumotlarni e’tiboringizga havola qilamiz.
- Burak Deniz va “Olis shahar” seriali aktrisasi Yaren Gyuldiken o‘rtasidagi munosabatlar tasdiqlandi
2025-yil iyun oyi boshlarida ommaviy axborot vositalarida aktyor Burak Deniz (“Tungi ertak”) va Yaren Gyuldiken (“Olis shahar”dagi Pokiza roli) birgalikda tasvirga olingan suratlari tarqaldi. So‘ng ularning munosabatlari jiddiy tus olayotgani haqida dalillar ko‘paya boshladi. Jumladan, ularning Turkiya chekka hududidagi bir uyda dam olayotgan paytdagi yangi suratlari paydo bo‘ldi. Ijtimoiy tarmoqlarda tarqalgan tasvirlar asosida yakuniy xulosa qilish qiyin bo‘lsa-da, ushbu holatni muxlislar e’tiborsiz qoldirmayapti.
- Feyyaz Sherifo‘g‘lu va Merve Dinkchel oila qurdi
O‘tgan hafta “Shisha ortidagi qiz” seriali aktyori Feyyaz Sherifo‘g‘lu hamda aktrisa Merve Dinkchelning to‘y marosimi turk matbuotining e’tibor markazida bo‘ldi. Tadbirda Hande Erchel ham ishtirok etdi.
To‘yda Disney+ loyihalarida ishlagan ko‘plab san’atkorlar va mashhur aktyorlar qatnashdi. Nikoh marosimi juda samimiy va hashamatli tarzda o‘tdi. Kelin va kuyov qasamyod paytida ko‘z yoshlarini tiyib turolmadi.
- Atakan Ozkaya tug‘ilgan kunini hamkasblari davrasida nishonladi
2025-yil 29-iyun kuni “Olis shahar” serialida Qayu rolini ijro etgan aktyor Atakan Ozkaya tug‘ilgan kunini nishonladi. Tadbirga serialdagi boshqa aktyorlar, jumladan Burak Shafak (Kadir) va Ferit Kaya (Demir) tashrif buyurdi.
- Afra Sarachog‘lu BTS a’zosi Jongukning muxlisi ekanini ma’lum qildi
“Qo‘rg‘on sirlari” serialining bosh rol ijrochisi Afra Sarachog‘lu o‘zining Janubiy Koreya musiqasi muxlisi ekanini oshkor qildi. U BTS guruhi a’zosi Jonguk haqidagi ijtimoiy tarmoqlardagi postlarga izoh yozdi. Buni ko‘rgan muxlislar aktrisaning qiziqishlarini qo‘llab-quvvatladi.
- Ayshe Akin anoreksiya bilan 10 yil kurashgani haqida so‘zlab berdi
“Qalbim eshigini qoq” serialidagi roli bilan tanilgan aktrisa Ayshe Akin yaqinda bergan intervyusida sog‘liq bilan bog‘liq muammolari haqida ochiq fikr bildirdi. U 10 yil davomida anoreksiya bilan kurashganini, ba’zida u hech narsa yemay yurishni istaganini so‘zlab berdi:
“Men o‘zimni doimo semiz deb hisoblardim. Shunday kunlar bo‘lar ediki, hech narsa yemaslik va bunga chiday olish uchun panoh so‘rab duo qilar edim”, dedi u.
- Gonja Vuslateri oyog‘idan jiddiy jarohat oldi
“Laylo” serialida Nur rolini ijro etayotgan aktrisa Gonja Vuslateri ijtimoiy tarmoqlar orqali oyog‘ini jiddiy shikastlaganini ma’lum qildi. Bu holat aktrisa chaqalog‘i uyg‘onganda zudlik bilan uning oldiga yugurganida yuz bergan.
Shu sababli serialning yangi qismi efirga kechiktirilib beriladigan bo‘ldi. Gonja hozirda uyda davolanmoqda va vaqtini farzandi bilan o‘tkazmoqda. Ma’lumot uchun, u 2024-yilning aprelida ona bo‘lgan edi.
- Ayshe Akin va “Kalmar o‘yini” aktyori Pak Son Xun o‘rtasida ishqiy munosabatlar bo‘lgan
Turkiya dizi olamida bu hafta koreys seriallari bilan bog‘liq yangiliklar ko‘p bo‘ldi. Jumladan, Ayshe Akin va Janubiy Koreya aktyori Pak Son Xun bir paytlar munosabatda bo‘lishgani ma’lum bo‘ldi.
Aktrisa bu haqida ochiq gapirib, u Koreyaga til o‘rganish uchun borgach, aktyor bilan tanishganini va unga “Shon-sharaf” dramasi orqali qiziqib qolganini bildirdi. Ularning munosabatlari uzoqqa cho‘zilmagan bo‘lsa-da, do‘stlik rishtalarini saqlab qolishgan.
- Chag‘atay Ulusoy “Uxlolmaydigan odam” nomli yangi filmda suratga tushishi mumkin
“Ashraf orzusi” serialidan keyin Chag‘atay Ulusoy yangi loyiha — “Uxlolmaydigan odam” nomli filmda bosh rolni ijro etishi kutilmoqda.
Rejissyorlik jamoasi hozirda unga mos hamkasb aktrisa izlamoqda. Hozircha Elchin Sangu va Hafsanur Sanjaktutan nomzod sifatida ko‘rib chiqilmoqda. Kasting jarayoni davom etmoqda.
- Miray Daner va Mert Ramazon Demir Disney+ uchun yangi serialda hamkorlik qiladi
“Qo‘rg‘on sirlari” seriali aktyori Mert Ramazon Demir hamda “Cheksiz sevgi” yulduzi Miray Daner yangi loyihada birgalikda rol ijro etishi rejalashtirilmoqda.
Serial “Bizga hech narsa bo‘lmaydi” (“Bize bir şey olmaz”) deb nomlanadi. Loyiha rejissyori Neslihan Yesilyurt, ssenariy muallifi esa Pinar Bulut bo‘ladi. Ayni damda aktyor va aktrisa shartnoma imzolash bosqichida turibdi. Agar hammasi reja asosida ketsa, 2025-yil iyul oxirida suratga olish ishlari boshlanadi.
Izoh (0)