Netflix’ning mashhur “Kalmar o‘yini” seriali muallifi Xvan Don Xyok Time nashriga bergan intervyusida serialdagi ayrim salbiy obrazlar Ilon Mask bilan o‘xshashliklarga ega ekanini aytib o‘tdi.
“Bugun Ilon Mask har yerda, har sohada faol. Serialdagi ba’zi VIP shaxslar chindan ham unga o‘xshab ketadi”, dedi rejissyor.
Uning fikricha, Ilon va serialdagi antagonistlarni o‘zaro birlashtiruvchi jihat — bu Maskning nafaqat global miqyosda ta’sirga ega texnologik kompaniya rahbari, balki jamoatchilik oldida faol chiqishlar qiladigan siyosiy shaxs sifatida ham tanilganidir.
Serialning so‘nggi mavsumida ilgari niqob ortida yashiringan tomoshabinlar yuzlarini ochadi va voqealar rivojida faol ishtirok eta boshlaydi. Xvan Don Xyok ushbu syujetni zamonaviy texnologiya gigantlari rahbarlari, jumladan, Ilon Mask bilan bog‘laydi:
Bugungi kunda biz yaxshi biladigan oligarx shaxslar, yirik texnologik kompaniyalar egalari ochiq maydonga chiqib, moliyaviy jihatdan kimlarni qo‘llab-quvvatlashini yashirmay aytmoqda. Endilikda hokimiyat va yirik tizimlarni boshqarayotgan odamlar parda ortida yashirinib o‘tirmaydi. Ular niqoblarini yechib, xuddi: “Hamma narsani biz boshqaryapmiz. Barcha nazorat bizning qo‘limizda”, degandek ish tutyapti, dedi Xvan Don Xyok.
Joriy yil 27-iyun kuni “Kalmar o‘yini” serialining yakunlovchi uchinchi mavsumi Netflix platformasida premyera qilindi. Unda bosh qahramon 456-o‘yinchi Son Gi Xun halokatli o‘yinga chek qo‘yish uchun sinovlarni davom ettiradi.
Izoh (0)