Yamanning “Ansorulloh”, ya’ni husiylar harakati Tel-Avivdagi Ben Gurion xalqaro aeroportiga muvaffaqiyatli zarba berilganini ma’lum qildi. Bu haqda Anadolu xabar berdi.
Husiylar vakili Yahyo Sariga ko‘ra, operatsiya gipertovushli “Falastin-2” raketasi yordamida amalga oshirilgan va Lod shahridagi Ben Gurion aeroportga yo‘naltirilgan.
Ta’kidlanishicha, ko‘zlangan maqsadga erishilgan. Hujum oqibatida aeroport faoliyati to‘xtab qolgan. Millionlab “sionistlar” boshpanalarga yashirinishga majbur bo‘lgan.
Sari operatsiyani Falastin xalqini qo‘llab-quvvatlash akti va Isroil armiyasining G‘azo sektoridagi harakatlariga javob deb atagan. Uning ta’kidlashicha, Isroilga hujumlar tajovuz to‘xtamaguncha va G‘azo sektori blokadasi bekor qilinmaguncha davom etadi. Bayonotda, shuningdek, husiy kuchlari yuzaga kelishi mumkin bo‘lgan hodisalar bo‘yicha shay holatda ekani qayd etilgan.
Isroil armiyasi havo hujumidan mudofaa tizimlari 6-iyun kuni Yamandan uchirilgan raketani urib tushirganini ma’lum qilgan. Husiylar G‘azo sektoriga davom etayotgan hujumlarga javoban Isroilga muntazam ravishda hujumlar uyushtirmoqda. Xalqaro tashkilotlarning ta’kidlashicha, bu hujumlardan asosan ayollar va bolalar aziyat chekmoqda.
G‘azoda 2023-yil 7-oktyabrda hujumlar boshlanganidan beri 193 mingdan ortiq falastinlik halok bo‘lgan yoki yaralangan. 11 mingdan ortiq odam bedarak yo‘qolgan va yuz minglab odamlar o‘z uylarini tashlab ketishga majbur bo‘lgan.
Izoh (0)