Isroil harbiy-dengiz kuchlari 10-iyun kuni Yamanning husiylar nazoratidagi Hodeyda port shahriga zarba berganini ma’lum qildi. Bu haqda Euronews xabar berdi.
Hujum haqida husiylar “Al-Masirah” axborot kanali orqali ma’lum qilgan. Unda aytilishicha, hujum Hodeydadagi doklarga qaratilgan, tafsilotlarga berilmagan. Bu hudud och, urushdan aziyat chekkan xalqqa yordam jo‘natish uchun juda muhim port hisoblanadi.
2023-yil oktyabr oyida G‘azoda urush boshlanganidan beri husiylar Isroilga qarata bir necha bor raketa va dronlar uchirgan. Shuningdek, isyonchilar falastinliklar bilan birdamlik harakati sifatida ta’riflagan tijorat kemalariga hujumlar uyushtirgan.
9-iyun kuni kechqurun Isroil yamanliklarni Ras-Isa, Hodeyda va as-Salif portlaridan evakuatsiya qilish haqida onlayn ogohlantirgandi.
“Portdan qurol-yarog‘larni o‘tkazish uchun foydalaniladi. Bu esa husiylar rejimining terrorchilik faoliyatini ilgari surish uchun fuqarolik infratuzilmasidan surbetlarcha foydalanishiga yana bir misoldir”, deyiladi Isroil harbiylarining bayonotida.
Hodeyda, shuningdek, 2014-yilda husiylar Yaman poytaxti Sanani egallab olganidan beri millionlab yamanliklar uchun oziq-ovqat va boshqa gumanitar yordam uchun asosiy kirish nuqtasi hisoblanadi.
Isroil mudofaa vaziri Israel Kats agar Isroilga hujumlar davom etsa, husiylarga dengiz va havo blokadasi bilan tahdid qilgan.
“Biz husiylar terrorchilik tashkilotini ular Isroilga o‘q uzishda davom etgan taqdirda, jiddiy qarshilikka duch kelishi hamda dengiz va havo blokadasi haqida ogohlantirdik”, degan vazir.
Husiylar Isroil tomonga uchirgan raketa va dronlarning aksariyati nishonga tegmagan yoki urib tushirilgan. Isroil qo‘shinlari bunga javoban bir necha bor havo hujumlarini amalga oshirgan, jumladan, Saana xalqaro aeroportiga hujumlar uyushtirilgandi.
2023-yil noyabridan 2025-yil yanvarigacha husiylar raketa va dronlar bilan 100 dan ortiq savdo kemalariga hujum qilib, ulardan 2 tasini cho‘ktirgan va 4 nafar dengizchini o‘ldirgan. Bu Qizil dengiz yo‘lagi orqali savdo oqimini sezilarli darajada kamaytirgan. Odatda har yili dengiz orqali 1 trillion dollar miqdoridagi tovarlar o‘tardi.
Izoh (0)