Rossiya harbiy kemasi sanksiyaga uchragan 2 ta neft tankeri bilan La-Mansh bo‘g‘ozidan o‘tayotganda soxta ID-signal ishlatdi. Bu haqda BBC xabar berdi.
“Boykiy” — boshqariladigan raketalar bilan qurollangan harbiy kema 21-iyun kuni bo‘g‘oz orqali o‘tayotganda soxta ID-kod namoyish etgan. Kuzatuv natijasida kema ilgari foydalanilgan ID’ni ishlatgani ma’lum bo‘lgan. BBC nashri ID ma’lumotni kemaning sun’iy yo‘ldosh tasvirlari va uning Daniyadagi ko‘prik ostidan o‘tayotgan videosi bilan solishtirgan.
U sanksiya ostidagi neft mahsulotlarini tashiydigan 2 ta kema bilan birga harakatlangani aytilgan. BBC izoh uchun Rossiyaning Londondagi elchixonasiga murojaat qilgan. G‘arbning rus flotiga qarshi so‘nggi sanksiyalari Moskvani tankerlarni himoya qilish shunday chora ko‘rishga majburlagan.
“Boykiy” iyun oyida G‘arbiy Afrikani tark etgan edi. U yerda kema diplomatik missiyada ishtirok etgan. Internetda e’lon qilingan suratlarda kema Gvineya poytaxti Konakriga yetib borganini ko‘rish mumkin.
Kema avtomatlashtirilgan identifikatsiya tizimini faollashtirmasdan portni tark etgan. Barcha kemalar signalni uzatsa, harbiy kemalar ko‘pincha signalsiz harakatlanadi. Biroq Kanar orollari yaqinida 400000000 identifikatsiya raqami ostida suzib ketayotgan kema qisqa vaqt ichida ko‘rinish bergan. Yuqoridagi kod ba’zan xavfsizlik sababli boshqalarni o‘zlarining mavjudligi haqida ogohlantirmoqchi bo‘lganda qo‘llaniladi.
BBC o‘rgangan sun’iy yo‘ldosh tasvirlarida 100 metr uzunlikdagi “Boykiy”ni aniqlangan. Keyinchalik kemaga Hindistondan Suvaysh kanali va O‘rta yer dengizi orqali — yo‘lga chiqqan ikkita neft tankeri qo‘shilgan. Ikkala kema ham Buyuk Britaniya tomonidan sanksiyaga uchragandi.
Kemalar 20-iyunda La-Mansh bo‘g‘ozida uchrashgan. Bu yerda Rossiya harbiy-dengiz kemasi radar va optik sun’iy yo‘ldosh tasvirlarida yana ko‘rinish bergan. So‘ngra ular Boltiq dengizi tomon yo‘l olgan, u yerda “Boykiy” Daniyadagi Buyuk kamar ko‘prigi ostidan o‘tgani qayd etilgan.
May oyida Estoniya Rossiyaning neftni olib ketayotgan sanksiyadagi kemasini tutib olishga uringan. Shu sababli Rossiya “Su-35” qiruvchi samolyoti Estoniya havo hududiga kiritgandi
“Mazkur harakat Britaniya va NATO davlatlarini kemalarga yaqinlashishdan qaytarishga qaratilgandek ko‘rinadi. Sababi harbiy kemaning mavjudligi qarama-qarshilik va yanada keskinlashuv xavfini oshiradi”, dedi Rossiyaning dengiz tahlillari markazi katta ilmiy xodimi Dmitriy Gorenburg.
Izoh (0)