Iyul oxirida Suriyadan Rossiyaga “Sparta II” savdo kemasi yetib kelgan, u, aftidan, harbiy texnikani tashib keltirgan. Bu haqda Bloomberg AQSH hukumati va Yevropa razvedkasidagi manbalariga tayanib xabar bermoqda.
“Sparta II” Novorossiyskka Suriyaning Tartus portidan yetib kelgan. Unga kamida 11 ta harbiy texnika ortilgan. Kema Rossiya Mudofaa vazirligi nazorati ostidagi “Oboronlogistika” kompaniyasiga tegishli bo‘lib, ushbu kompaniya AQSH sanksiyalariga uchragan.
AQSH va Yevroittifoq taxmin qilishicha, Rossiya Qora dengiz orqali harbiy texnika olib o‘tish uchun bir necha marta savdo kemalaridan foydalangan va shu tariqa, Bosfor va Dardanell bo‘g‘ozlari orqali harbiy kemalar o‘tishiga qo‘yilgan taqiqni chetlab o‘tgan. Turkiya ushbu taqiqni Rossiya Ukrainaga bostirib kirganidan keyin ko‘p o‘tmay joriy qilgan edi.
Rossiya urush va o‘z mudofaa sektoriga qarshi sanksiyalar sharoitida harbiy texnikasi va shaxsiy tarkibidagi talafotlar o‘rnini to‘ldirish uchun manbalar qidirayotgan bo‘lishi mumkin. Ozarbayjon Tog‘li Qorabog‘da rossiyalik tinchlikparvarlar soni qisqarganini ma’lum qildi, AQSH hukumati esa Moskvaning Erondan jangovar dronlar sotib olish rejalari haqida bildirib o‘tdi. Bundan tashqari, Rossiya KXDRdan artilleriyalar yetkazib berish haqida shartnoma tuzishi mumkin, deya ma’lum qildi Bloomberg manbalaridan biri.
“Pentagon qayd etishicha, fevraldan buyon Ukrainaga 9,1 milliard dollarlik harbiy yordam yetkazgan. Kiyevdagi hukumat, shuningdek, Buyuk Britaniya va NATOning boshqa a’zolaridan milliardlab dollarlik qurol-yarog‘ olgan. Ukraina kuchlari, AQSH tomonidan taqdim etilgan HIMARS uzoq masofali artilleriyadan foydalanib, so‘nggi vaqtlarda Rossiya ta’minot chiziqlariga va front chizig‘idan tashqaridagi o‘q-dori omborlariga, shuningdek, asosiy infratuzilmaga tobora samaraliroq zarbalar berib kelmoqda”, — deyiladi Bloomberg xabarida.
Izoh (0)