Ro‘ziqul Berdiyev va Andrey Miklyayev jarimaga tortildi, Sardor Rahmonovning diskvalifikatsiyasi bekor qilindi

O‘zbekiston futbol assotsiatsiyasi Tartib-intizom qo‘mitasining navbatdagi yig‘ilishi bo‘lib o‘tdi. Unda bir qator uchrashuvlardagi intizomiy ishlar ko‘rib chiqildi.

Superliganing 21-turi doirasidagi “OKMK” — “So‘g‘diyona” uchrashuvi bo‘yicha “OKMK” futbol klubidan murojaat kelib tushgan. Unga ko‘ra, mazkur uchrashuvning 67-daqiqasida “OKMK” futbolchisi Sardor Rahmonovga uchrashuv bosh hakami tomonidan berilgan ikkinchi sariq, qizil kartochka bo‘yicha vaziyat O‘zbekiston futbol hakamlari markazining tashabbusi hamda “OKMK” futbol klubi murojaatiga asosan Espert hakamlar komissiyasi tomonidan ko‘rib chiqilib, bosh hakam tomonidan ushbu vaziyatda xato qaror chiqarilgan deb topilgan.

Sardor Rahmonovga ko‘rsatilgan ikkinchi sariq va qizil kartochka Intizom kodeksining 5.61-bandiga asosan bekor qilindi.

Superliganing 21-turi doirasidagi “Nasaf” — “Neftchi” uchrashuvi yakunlangandan so‘ng “Nasaf” bosh murabbiyi Ro‘ziqul Berdiyev raqib jamoa aʼzolariga nisbatan haqoratli so‘zlar ishlatgani va ularga nisbatan tajovuzkor harakatlar qilgani qayd etilgan.

Tartib-intizom qo‘mitasining qaroriga ko‘ra, Ro‘ziqul Berdiyevga (“Nasaf”) nisbatan jarima intizom chorasi qo‘llanildi.

Pro liganing 20-turi doirasidagi “Mashʼal” — “Lokomotiv” uchrashuvining birinchi bo‘lim yakunlangandan so‘ng “Lokomotiv” futbolchisi Oleg Zoteyev uchrashuv zaxira hakami shaʼniga haqoratli so‘zlar ishlatgani uchun maydondan chetlashtirilgan. Mazkur holat bo‘yicha “Lokomotiv” futbol klubi uchrashuv hakami tomonidan futbolchi Zoteyevga berilgan qizil kartochka bo‘yicha oydinlik kiritishda amaliy yordam so‘ralgan.

Qo‘mita yig‘ilishida uchrashuv zaxira hakami Firdavs Norsafarov va futbolchi Zoteyevlarning ko‘rsatmalari tinglandi, shuningdek taklif etilgan mutaxassislarning xulosalariga muvofiq berilgan qizil kartochkani bekor qilish uchun yetarlicha asoslar topilmadi.

Shuningdek, uchrashuvining 59-daqiqasida “Lokomotiv” klubi murabbiyi Andrey Miklyayev bosh hakam shaʼniga haqoratli so‘zlar ishlatgan.

Tartib-intizom qo‘mitasining qaroriga ko‘ra, Andrey Miklyayevga (“Lokomotiv”) nisbatan 2 ta o‘yinga chetlashtirish va jarima intizom chorasi qo‘llanildi.