Dunyoning ko‘plab nuqtalarida koronavirusning yangi turi tarqalmoqda. Xitoy va Osiyoning boshqa bir qator mamlakatlarida COVID-19 ning qayta avj olishiga yangi NB.1.8.1 varianti sabab bo‘lgani aniqlangan. Bu haqda CNN xabar berdi.
Yevropadagi ekspertlar kasallanish holatlari ko‘payishi mumkinligini taxmin qilmoqda. Qo‘shma Shtatlarda ham yozgi to‘lqin kuzatilishi mumkinligi aytilgan. AQSH Kasalliklarni nazorat qilish va oldini olish markazlari ma’lumotlariga ko‘ra, NB.1.8.1 7-iyun holatiga ko‘ra COVID-19 yangi holatlarining taxminan uchdan bir qismini tashkil qilgan. Bu bir oy oldin yangi variant COVID-19 holatlarining atigi 5 foizini tashkil etgandi.
Odamlar COVID-19 bilan kasallanish xavfini kamaytirish uchun qanday ehtiyot choralarini ko‘rishlari kerak? Mavjud vaksinalar bu turga ta’sir qiladimi? Bu savollarga CNN sog‘liqni saqlash bo‘yicha mutaxassisi, tez yordam shifokori va Jorj Vashington universiteti klinik dotsenti doktor Leana Ven javob berdi.
Yangi variant haqida nimalarni bilish zarur?
SARS-CoV-2 virusi doimiy ravishda mutatsiyaga uchramoqda va uning yangi variantlari paydo bo‘lishi kutilmoqda. Virusga tarqalish uchun qancha ko‘p imkoniyat berilsa, uning mutatsiyaga uchrash imkoniyati shuncha ko‘p bo‘ladi.
Nimbus deb ham ataladigan ushbu yangi variant – NB.1.8.1 omikron shtammining avlodi hisoblanadi. Jahon sog‘liqni saqlash tashkiloti yangi shtammni “nazorat ostidagi variant” deb topgan. Ushbu shtamm avvalgi variantlardan ko‘ra yuqumliroq bo‘lishi mumkin.
Mavjud vaksinalar ushbu variantga qarshi ishlaydimi yoki yo‘qmi, bu savolga javob noma’lum. JSST laboratoriya ma’lumotlariga ko‘ra, oldingi infeksiya bilan zararlangan immunitetga vaksinalar kamroq javob berishi mumkin.
NB.1.8.1 ning belgilari qanday?
Simptomlar boshqa variantlarnikiga o‘xshab ketadi. Ba’zi bemorlarda allergiyaga o‘xshash alomatlar bo‘lishi mumkin, masalan, burun bitishi va burun oqishi. Boshqalarda shamollash yoki grippga o‘xshash alomatlar bo‘lishi mumkin, isitma, tomoq og‘rig‘i, charchoq, bosh og‘rig‘i va mushaklar yoki tana og‘rig‘i kabi. Ba’zi odamlarda yo‘tal paydo bo‘lishi va nafas olish qiyinlashishi mumkin. Ba’zilarda ko‘ngil aynishi, qusish yoki diareya bo‘ladi.
Yana yozda kasallik to‘lqini bo‘ladimi?
Ha. To‘lqin shunchaki populyatsion immunitetning pasayishi tufayli ham yuzaga kelishi mumkin. Ba’zi ekspertlarning fikricha, ushbu yangi shtammning paydo bo‘lishi va COVID-19 ning so‘nggi faolligi yaqin bir necha oy ichida to‘lqinni boshlab yuborishi mumkin.
Izoh (0)