O‘qituvchilarning koronavirusga qarshi emlanishi mutloqo bepul va buning uchun hech qanday haq olinmaydi. Bu haqda AOKAda bo‘lib o‘tgan matbuot anjumanida Sanitariya-epidemiologik osoyishtalik va jamoat salomatligi qo‘mitasi raisi o‘rinbosari Nurmat Otabekov maʼlum qildi.
Bugun AOKAda Sanitariya-epidemiologik osoyishtalik va jamoat salomatligi qo‘mitasi raisi o‘rinbosari va mutasaddilari ishtirokida matbuot anjumani bo‘lib o‘tdi. Unda yuqumli kasalliklarning oldini olish va sanitariya yo‘nalishi bo‘yicha bajarilgan ishlar, OAV hamda ijtimoiy tarmoqlarda tarqalayotgan turli asoslanmagan xabarlarga asosli javoblar berildi.
Matbuot anjumanida so‘z olgan “Daryo” muxbiri O‘zbekistondagi mavjud umumtaʼlim maktablarida faoliyat yurituvchi o‘qituvchilar yiliga ikki marotaba koronavirusga qarshi emlanishga majbur bo‘lishi, o‘qituvchida emlangani haqidagi sertifikat bo‘lmasa, u dars ololmasligi bilan qo‘rqitilishini aytib, “Bu qanchalik asosli? O‘qituvchining koronavirusga qarshi emlanish xarajatini kim qoplaydi?”, — deya savol berdi.
O‘zbekiston sharoitida aholi koronavirusga qarshi bepul emlanadi. U xoh o‘qituvchi bo‘lsin, xoh tibbiyot xodimi bo‘lsin, farqi yo‘q. O‘zbekistonda koronavirusga qarshi 8 turdagi vaksina bor va vaksina oluvchi ulardan birini tanlab, bepul emlanish huquqiga ega. Bu vaksinalarning 20 foizi koronavirusga qarshi xalqaro jamg‘arma hisobidan qoplangan bo‘lsa, qolgani davlat budjeti hisobidan to‘liq to‘langan.
Vaziyat murakkab bo‘lgan paytda emlanmagan aholini ishga qo‘ymaslik haqida ko‘rsatma berilgani ham rost. Endilikda koronavirus bo‘yicha vaziyat barqaror. Shu sabab biz emlanishni ixtiyoriy amalga oshirish haqida to‘xtamga kelganmiz. Koronavirusga qarshi emlanmagan insonni ishga olmaslik, maktabda dars soatini bermaslik talabi yo‘q, — dedi Sanitariya-epidemiologik osoyishtalik va jamoat salomatligi qo‘mitasi raisi o‘rinbosari Nurmat Otabekov.
Izoh (0)