Hindistonda koronavirusni yuqtirganlar soni 3700 kishidan oshdi. Bu so‘nggi bir necha oy ichidagi keskin o‘sish hisoblanadi. Bu haqda mamlakatning Sog‘liqni saqlash va oilaviy farovonlik vazirligiga tayanib Hindustan Times xabar berdi.
So‘nggi bir kunda 360 dan ortiq yangi yuqtirish holatlari qayd etilgan. Mamlakatda bir sutka ichida kovidga chalingan ikki kishi vafot etgan. Qurbonlardan biri 63 yoshli erkak bo‘lib, yondosh kasalliklari bo‘lgan. Vafot etgan 24 yoshli ayolda ham boshqa kasalliklar kuzatilgan. Koronavirus yuqtirishning eng ko‘p holatlari Kerala (1 336) va Maxarashtra (467) shtatlarida, shuningdek, Dehlida (375) qayd etilgan.
O‘tgan haftada mamlakatda COVID-19 bilan kasallanganlar soni 257 nafarni tashkil etgandi. Shunday qilib, 10 kun ichida bu ko‘rsatkich 10 martadan ko‘proqqa oshgan, deyiladi xabarda.
Yangi kasallanish holatlarining aksariyati yengil shaklda kechmoqda. Shunga qaramay, rasmiylar fuqarolarni hushyorlik va ehtiyotkorlik choralarini ko‘rishga — odamlar gavjum joylarda niqob taqish, ijtimoiy masofani saqlash, qo‘l va xonalar gigiyenasiga rioya qilishga chaqirgan.
Tarqalayotgan kovid variantlari
So‘nggi paytlarda ayrim shtatlarda Covid bilan kasallanish holatlarining ko‘payishi ikkita yangi variant — NB.1.8.1 va LF.7 ning paydo bo‘lishi bilan bog‘liq. Ushbu variantlar avvalgi shtammlardan genetik farqlarni ko‘rsatadi. Jahon sog‘liqni saqlash tashkiloti ularni global miqyosda o‘sib borayotgan tarqalishi va immunitet himoyalaridan qochish qobiliyati tufayli hali “Xavotirli variantlar” toifasiga kiritmagan. Hozirda yuqoridagi kovid turlari “Nazorat ostidagi variantlar” toifasida turibdi.
Xavotirlanish asoslimi?
Ushbu subvariantlar o‘zidan oldingilarga qaraganda yuqumliroq bo‘lib, Xitoy, Tayvan, Gonkong va Avstraliya kabi mamlakatlarda kasallanish va kasalxonaga yotqizish holatlarining ko‘payishiga hissa qo‘shgan. Ularning tez tarqalishi sog‘liqni saqlash idoralari tomonidan ehtiyotkorlikni, ayniqsa zaif va yuqori xavfli aholi qatlamlariga tavsiyalar berishga olib kelgan.
O‘zbekiston Sanitariya-epidemiologik osoyishtalik va jamoat salomatligi qo‘mitasi raisi birinchi o‘rinbosari Nurmat Otabekov koronavirus bilan bog‘liq epidemiologik vaziyat barqarorligini aytgan.
Shu yil mart oyida koronavirusning Xitoyda aniqlangan NB.1.81 shtammi ba’zi mamlakatlar bo‘ylab tarqalayotgani haqida ma’lumotlar bor, lekin COVID-19 ning yangi to‘lqini dunyoni qamrab olmoqda, degan xabarlar asossiz, deydi u.
Izoh (0)