Ijtimoiy tarmoqda qovun va tarvuz mahsulotlarini iste’mol qilish oqibatida bir necha fuqaroning vafot etgani to‘g‘risidagi xabar tarqaldi. Sanepidqo‘mita holat yuzasidan ma’lumot berdi.
Unda aytilishicha, tarvuz-qovundan zaharlanish oqibatida aholi vafot etish holatlari qayd etilmagan. Poliz mahsulotlarini iste’mol qilish bilan bog‘liq oshqozon-ichak faoliyatining buzilish holatlari uchrab turishi mumkin va unga bir necha omillar sabab bo‘ladi:
- odam organizmining o‘ziga xos xususiyatlariga;
- bir paytda iste’mol qilish mumkin bo‘lmagan mahsulotlarning aralashtirib iste’mol qilinishi;
- poliz mahsulotining eskirib qolgani (kesilgandan keyin uzoq vaqt turib qolgani);
- ular tarkibida nitrat va nitritlarning me’yordan ortiqligi va boshqalar.
Qayd etilishicha, aholi poliz mahsulotlarini xarid qilishda quyidagilarga e’tibor qaratishi zarur:
- faqat ruxsat etilgan (savdo rastalari, bozor hududi, savdo majmualari) joylardan poliz mahsulotlarini xarid qilish;
- poliz mahsulotlarni xarid qilish jarayonida laboratoriya tekshiruvlaridan o‘tganligiga e’tibor qaratish;
- katta (magistral) yo‘l yoqalari, aholi yashash mavzelarida sotilayotgan poliz mahsulotlari laboratoriya tekshiruvlaridan o‘tmagan bo‘lishi mumkinligini unutmaslik kerak.
Bundan avval ijtimoiy tarmoqlarda Surxondaryo viloyatida yetishtirilgan qovun mahsulotlarida nitrat miqdori meʼyordan ortiq ekani va uni isteʼmol qilgan fuqarolar zaharlanayotgani haqida xabarlar tarqalgan edi. Ayni kunga qadar viloyatdagi biror tibbiyot muassasasiga qovun isteʼmoli orqali zaharlanish holati bilan murojaat qilinmagani aytilgan.
Izoh (0)