Iyul oyida aksar oziq-ovqat mahsulotlari arzonlashdi, nooziq-ovqat mahsulotlari hamda xizmatlar narxi o‘sishda davom etdi. Bu haqda Statistika agentligi maʼlumot berdi.
O‘zbekistonda joriy yil iyul oyida deflyatsiya kuzatilib, narxlar 0,3 foizga pasaydi. Yillik inflyatsiya 10,5 foizni tashkil etdi.
O‘tgan oyda oziq-ovqat mahsulotlari iyundagiga qaraganda 1,5 foiz arzonlashdi. Nooziq-ovqat mahsulotlari 0,7 foiz, xizmatlar 0,5 foiz qimmatlashdi.
Asosiy oziq-ovqat mahsulotlaridan go‘sht 1,5 foiz, guruch 0,5 foiz, kungaboqar yog‘i 1 foizga qimmatlashgan. Bug‘doy uni 0,3 foiz, sut 0,5 foiz, tuxum 2,5 foiz, shakar 0,3 foiz arzonlashgan.
Iyul oyida qator meva-sabzavotlar narxlarida keskin pasayish kuzatildi. Xususan, tarvuz 43 foizga, pomidor 40,7 foiz, baqlajon 35,8 foiz, qovun 31,3 foiz, bodring 11,9 foiz, olma 5,6 foiz, kartoshka 2,6 foizga arzonlashgan.
O‘tgan oy davomida benzin 0,7 foizga arzonlashgan, metan narxi o‘zgarmagan, propan esa 3,8 foiz qimmatlashgani qayd etilgan.
Iyulda transport narxlari ham iyundagiga nisbatan o‘sishda davom etgan. Jumladan, shahar atrofida qatnaydigan poyezdlar yo‘l haqi oy davomida 3,4 foizga, uzoq masofaga qatnaydigan poyezdlar chiptasi 2,5 foizga qimmatlashgan. Respublika ichida aviaqatnovlar chiptasi 0,6 foizga, xalqaro yo‘nalishdagi aviaqatnovda chiptalar 0,9 foizga oshgan.
Elektr va gaz narxlari 0,2 foizga ko‘tarilgan. Issiq suv taʼminoti uchun to‘lov narxi 2,6 foiz, markaziy isitish tizimi uchun to‘lov 3,2 foiz qimmatlashgan.
Iyul oyida dori vositalarining narxlari ham oshishda davom etib, iyundagidan 2,2 foizga qimmatlashgan. Kiyim-kechaklar narxlari 0,6 foiz ko‘tarilgan bo‘lsa, turar–joylar uchun ijara narxlari o‘zgarmagan.
Izoh (0)