Afg‘onistonning Balx viloyatida bu yil qishloq xo‘jaligi, ayniqsa, tarvuz va qovun yetishtirish o‘tgan yillarga nisbatan bir necha barobar oshdi. Biroq Mozori Sharif fuqarolari iqtisod zaifligi sababli meva va boshqa qishloq xo‘jaligi mahsulotlarini sotib olishga qurbi yetmaydi. “Daryo” muxbiri bilan suhbatda mozori-sharifliklar mavjud muammolar haqida gapirib berdi.
Ma’lum bo‘lishicha, Balx viloyatidagi o‘n to‘rtta tumanning barchasi dehqonchilik bilan shug‘ullanadi.
“Tolibon” yetakchilari xalqning iqtisodiy muammolarini o‘ylab, ularni hal qilish uchun jiddiy choralar ko‘rishi kerak. Aks holda tez orada falokat yuz beradi va odamlar ochlikdan o‘layotganini ko‘ramiz, deydi mahalliy aholi.
Balxlik dehqonlardan biri 20 yil ichida qovun va tarvuzning bunchalik arzon bo‘lmaganini, o‘tgan yillarda 150 afg‘oniga (taxminan 27 ming so‘m) sotilgan qovun hozirda 50 afg‘oniga (taxm. 9 ming so‘m) sotilayotganini ta’kidlagan.
Shaxsan men bu holatdan mamnun emasman, chunki ikki yuz ming afg‘oni pul qarz olib, dehqonchilik bilan shug‘ullanganman, endi ellik ming afg‘oniga qovun-tarvuzimni sotib, bu yil dehqonchilikdan ko‘p zarar ko‘rdim, kelajakda qovun-tarvuz yetishtirmayman, deydi u.
Afg‘onistonda qovun kilogramm bilan emas faqat dona bilan sotiladi, eng arzon qovun 10 afg‘oni (taxm. 2 ming so‘m) va eng qimmat qovun narxi esa 50 afg‘oni turadi.
Mozori Sharifdagi ba’zi qovun sotuvchilar ham bu yil qovun hosili juda yaxshi, lekin qovun savdosi foyda olib kelmayotganini ta’kidlagan.
O‘zini Naqibulla deb tanishtirgan savdogarlardan biri ham qovun sotish bilan shug‘ullanadi. Uning “Daryo” muxbiriga ma’lum qilishicha, xalq sotib olishga qurbi yetmagani uchun birorta ham qovun sota olmagan. U qovun va tarvuz bundan arzonlashib ketishidan xavotir bildirgan.
Yana bir mahalliy savdogarning so‘zlariga ko‘ra, Mozori Sharif dehqonlari bu yil o‘z xarajatlarini qoplay olmagan va zarar ko‘rgan. Uning qo‘shimcha qilishicha, taklif 90 foiz, talab esa 10 foizni tashkil etadi. Qovun arzonligi sababi esa Pokistondan boshqa chet davlatga eksport qilinmasligi bilan izohlangan.
Izoh (0)