Ijtimoiy tarmoqlarda Surxondaryo viloyatida yetishtirilgan qovun mahsulotlarida nitrat miqdori meʼyordan ortiq ekani va uni isteʼmol qilgan fuqarolar zaharlanayotgani haqida xabarlar tarqalmoqda.
Mazkur holat yuzasidan viloyat hokimligi maʼlumot berdi. Unda aytilishicha, viloyatdagi barcha dehqon va oziq-ovqat bozorlarida poliz mahsulotlari, jumladan, qovunlar doimiy ravishda veterinariya-sanitariya laboratoriyalarida tekshiruvdan o‘tkaziladi.
Ulardagi nitrat miqdori belgilangan sanitariya meʼyorlariga muvofiq deb topilgandagina savdoga chiqarilishiga ruxsat beriladi. Ayni kunga qadar viloyatdagi biror tibbiyot muassasasiga qovun isteʼmoli orqali zaharlanish holati bilan murojaat qilinmagan.
Shuningdek, ijtimoiy tarmoqlarda tarqalgan videolavhalardagi qovun navlari Surxondaryo viloyatida yetishtiriladigan mahsulotlarga hech qanday aloqasi yo‘q. Viloyat dehqonlari bugungi kunda sifatli, talabga javob beradigan qovun navlarini yetishtirib, mahalliy bozorlarga yetkazib bermoqda.
“Shu munosabat bilan aholiga murojaat qilib, ijtimoiy tarmoqlarda tarqatilayotgan norasmiy va tasdiqlanmagan maʼlumotlarga ishonmasliklarini, faqat rasmiy manbalarga tayanishlarini so‘raymiz. Tarqalgan videolardagi maʼlumotlar haqiqatga to‘g‘ri kelmasligi va ular mutlaqo yolg‘on ekanini maʼlum qilamiz”, deyiladi xabarda.
Izoh (0)