Moliyaviy ekspert Shennon Makley 2025-yilda moliyaviy barqarorlikka erishish uchun qaysi odatdan voz kechish kerakligi haqida o‘z tavsiyasini berdi. Uning so‘zlariga ko‘ra, impulsiv xaridlarni amalga oshirish imkonini beradigan mobil ilovalarni smartfondan o‘chirib tashlash lozim.
“Biz pul topish uchun astoydil ishlaymiz, mehnat qilamiz. Shu sababli bugungi kunda o‘ylamay turib pul sarf qilish jarayonini o‘zimiz uchun iloji boricha qiyinlashtirish kerak”, dedi u.
Shennonning ta’kidlashicha, to‘lov ilovalari xarajatlar jarayonini juda soddalashtirib yuboradi, natijada pul qanday sarflanib ketayotganini sezmay ham qolamiz. Ko‘plab odamlar o‘z daromadlari qayerga ketayotganini anglamasligi eng katta muammodir:
“Mijozlarimdan tez-tez eshitaman: ‘Ishlayman, lekin pul qayoqqa ketayotganini tushunmayman’ deyishadi. Bu esa, odatda, xarajatlarni nazorat qilmaslik oqibati hisoblanadi” deydi mutaxassis.
Moliyaviy qiyinchiliklar ko‘pincha xavotir tuyg‘usi bilan kechadi, bu esa odamlarni pul mavzusidan qochishga majbur qiladi. Biroq Makley ta’kidlaganidek, moliyaviy holatni o‘zgartirishga harakat qilishdan to‘xtamaslik zarur.
Tadqiqotlarga ko‘ra, odamlarning 73 foizi pul sababli stressga tushadi. Shu sababli mutaxassis moliyaviy barqarorlik tomon kichik qadamdan boshlashni tavsiya qiladi:
“Xarajatlaringizni yozib boring, ularni maxsus ilovalar orqali yoki oddiy telefon eslatmalariga ham qayd etish mumkin. Bunday usul byudjetni ongli boshqarishga yo‘l ochadi”, deya yakunladi Makley.
Izoh (0)