Prezident Shavkat Mirziyoyev 28-may kuni Samarqandga tashrif buyurib, Imom Buxoriy maqbarasini ziyorat qildi. Qurʼon oyatlari tilovat qilindi. Bu haqda Prezident matbuot xizmati xabar berdi.
Butun islom olamida Imom Buxoriyning hurmati yuksak, uning maqbarasini ko‘rish istagidagi insonlar ko‘p. Shu bois ziyoratchilarga sharoitlarni kengaytirish maqsadida bu yerda yangi majmua barpo etilmoqda.
Tashrif chog‘ida prezident qurilishning borishini ko‘zdan kechirdi.
Majmuaning umumiy maydoni 44 gektarga kengaytirilgan. Hozirgi kunda mo‘tabar maqbara, 10 ming kishilik masjid, 4 ta minora qurib bitkazilgan.
Yangi majmua ziyorat bilan birga maʼrifat, tarbiya, ibrat o‘chog‘i bo‘ladi. Muzey, maʼmuriyat, mehmonxona va boshqa xizmat ko‘rsatish binolarini o‘z ichiga oladi. Peshtoqlar va ayvon devorlariga “Sahihi Buxoriy”dan hadislar bitiladi.
Davlat rahbariga majmuada bo‘lajak sharoitlar haqida axborot berildi. Maqbara hovlisi va xiyobonlarga ko‘proq daraxtlar ekish zarurligi aytildi.
Izoh (0)