Davlat byudjetidan ajratilgan subsidiya mablag‘lari ayrim mansabdor shaxslar tomonidan talon-toroj qilinganligi fosh etildi. Bu haqda Bosh prokuratura matbuot xizmati xabar berdi.
Maʼlum qilinishicha, Farg‘ona shahar Kambag‘allikni qisqartirish va bandlik bo‘limining mansabdor shaxslari tomonidan 29 nafar haqiqatda ishsiz bo‘lmagan shaxslarga 145 mln so‘mlik subsidiyalar asossiz ravishda berilganligi aniqlandi.
Shuningdek, subsidiya ajratish haqida murojaat qilmagan 8 nafar shaxslarga 34,2 mln so‘mlik subsidiyalar qonunga xilof ravishda ajratilgani maʼlum bo‘ldi.
Shu bilan birga, subsidiya olish uchun haqiqatda murojaat qilmagan fuqarolar nomiga ularning xabarisiz go‘yoki ularga subsidiya asosida 21 mln so‘mlik tikuv mashinalari berilganligi haqida soxta hujjatlar rasmiylashtirilib, mahsulotlar o‘zlashtirilgan.
Oqibatda mansabdor shaxslar va boshqalar tomonidan 213 mln so‘mlik juda ko‘p miqdordagi davlat byudjeti hisobidan ajratilgan subsidiya mablag‘lari talon-toroj qilingan.
Mazkur holat yuzasidan Jinoyat kodeksining 167-moddasi 3-qismi “a” bandi (firibgarlik juda ko‘p miqdorda) bilan jinoyat ishi qo‘zg‘atilib, dastlabki tergov harakatlari olib borilmoqda.
Zangiotada “Yoshlar — kelajagimiz” jamg‘armasi rahbarlari katta summadagi kredit mablag‘larini talon-toroj qilgani aniqlangani, Buxoroda sektor kotibi “temir daftar”ga soxta ma’lumot kiritib, ehtiyojmandlarga ajratilgan pulni o‘zlashtirgani, Buxoroda qabristonni obodonlashtirishga sarflanishi lozim bo‘lgan pullar talon-toroj qilingani haqidagi murojaat yuzasidan prokuratura tekshiruvi boshlangani haqida xabar berilgan edi.
Izoh (0)