Давлат бюджетидан ажратилган субсидия маблағлари айрим мансабдор шахслар томонидан талон-торож қилинганлиги фош этилди. Бу ҳақда Бош прокуратура матбуот хизмати хабар берди.
Маълум қилинишича, Фарғона шаҳар Камбағалликни қисқартириш ва бандлик бўлимининг мансабдор шахслари томонидан 29 нафар ҳақиқатда ишсиз бўлмаган шахсларга 145 млн сўмлик субсидиялар асоссиз равишда берилганлиги аниқланди.
Шунингдек, субсидия ажратиш ҳақида мурожаат қилмаган 8 нафар шахсларга 34,2 млн сўмлик субсидиялар қонунга хилоф равишда ажратилгани маълум бўлди.
Шу билан бирга, субсидия олиш учун ҳақиқатда мурожаат қилмаган фуқаролар номига уларнинг хабарисиз гўёки уларга субсидия асосида 21 млн сўмлик тикув машиналари берилганлиги ҳақида сохта ҳужжатлар расмийлаштирилиб, маҳсулотлар ўзлаштирилган.
Оқибатда мансабдор шахслар ва бошқалар томонидан 213 млн сўмлик жуда кўп миқдордаги давлат бюджети ҳисобидан ажратилган субсидия маблағлари талон-торож қилинган.
Мазкур ҳолат юзасидан Жиноят кодексининг 167-моддаси 3-қисми “а” банди (фирибгарлик жуда кўп миқдорда) билан жиноят иши қўзғатилиб, дастлабки тергов ҳаракатлари олиб борилмоқда.
Зангиотада “Ёшлар — келажагимиз” жамғармаси раҳбарлари катта суммадаги кредит маблағларини талон-торож қилгани аниқлангани, Бухорода сектор котиби “темир дафтар”га сохта маълумот киритиб, эҳтиёжмандларга ажратилган пулни ўзлаштиргани, Бухорода қабристонни ободонлаштиришга сарфланиши лозим бўлган пуллар талон-торож қилингани ҳақидаги мурожаат юзасидан прокуратура текшируви бошлангани ҳақида хабар берилган эди.
Изоҳ (0)