Andijon viloyatining Jalaquduq tumanida 50 nafar fuqaroga ajratilgan subsidiya mablag‘lari talon-taroj qilingani aniqlandi, deb xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Ma’lum qilinishicha, “X.B.” ishlab chiqarish kooperativi rahbari va Jalaquduq tuman aholi bandligiga ko‘maklashish markazi mas’ul shaxslari oldindan til biriktirib, tumandagi 50 nafar kam ta’minlangan va ishsiz fuqarolar nomiga subsidiya mablag‘larini ajratish orqali “X.B.” kooperativiga 111,5 million so‘m o‘tkazgan.
Bosh prokuratura huzuridagi departamentning Jalaquduq tuman bo‘lim tomonidan o‘tkazilgan tergovga qadar tekshiruvda ushbu mablag‘lar fuqarolarga hech qanday mahsulot yetkazmasdan yoki xizmat ko‘rsatmasdan o‘zlashtirish yo‘li bilan talon-toroj qilingani aniqlangan.
Holat yuzasidan Jinoyat kodeksining 167-moddasi (talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Zangiotada “Yoshlar — kelajagimiz” jamg‘armasi rahbarlari katta summadagi kredit mablag‘larini talon-toroj qilgani aniqlangani, Buxoroda sektor kotibi “temir daftar”ga soxta ma’lumot kiritib, ehtiyojmandlarga ajratilgan pulni o‘zlashtirgani, Buxoroda qabristonni obodonlashtirishga sarflanishi lozim bo‘lgan pullar talon-toroj qilingani haqidagi murojaat yuzasidan prokuratura tekshiruvi boshlangani haqida xabar berilgan edi.
Izoh (0)