Кўпинча биз уйда қанчалик кўп фойдасиз нарсалар тўпланиб қолганини сезмаймиз ҳам. Бундай нарсалардан воз кечиш, уйда янгича атмосферани пайдо қилиш билан бирга, сизга ўзига хос руҳий янгиланишни ҳам бахш этади. Агар сиз уйингиздаги ортиқча нарсалардан халос бўлишга қарор қилган бўлсангиз, қайси нарсалардан бошлаш керак.
Бўш қоғоз қутилар
Баъзида биз техника ёки пойабзалдан қолган бўш қутиларини узоқ вақт сақлаймиз. Аммо яқин вақт ичида кўчиш ва қутиларга нарсаларни жойлаштириш режангизда бўлмаса, уларни қайта ишлашга топшириш (ёки ҳатто ташлаб юбориш) мақсадга мувофиқдир.
Кийилмайдиган кийим ва пойабзаллар
Жавонингиздаги ушбу нарсалар бир неча мавсумдан бери кийилмай ётибди. Балки сизга ўлчами мос келмай қолгандир, балки бундай ҳашаматли кечки либосда боришга жой топа олмаяпсиз ёки бу нарсалар сизга ёқмай қолгандир.
Буларнинг барчаси кийим ёки пойабзалдан халос бўлиш учун асосли сабаблардир. Агар нарсалар яхши ҳолатда бўлса, уларни сотиб юборинг ёки эҳсон қилинг, агар йўқ бўлса, ташлаб юборинг ёки қайта ишлашга топширинг.
Тақилмаётган тақинчоқлар
Узоқ вақтдан бери тақилмай ётган заргарлик буюмлари ҳам уйингиздан чиқиб кетишга номзоддир. Уларни дўстингизга совға қилинг ёки сотувга қўйинг.
Эски телефонларнинг симлари ва қопламалари
Бўш қутилардан кейин яна бир (тушунарсиз) одат — эски телефонларнинг зарядловчи симлари ва қопламаларини сақлашдир. Тан олинг, буларнинг ҳеч бири сизга энди керак бўлмайди, шунинг учун симларни ахлат қутисига (яхшиси қайта ишлашга) ташланг.
Керакcиз қоғозлар
Керакcиз эски ёзувлар, кафолат варақалари, шартномалар — буларнинг барчаси баъзи одамларда ўн йиллар давомида сақланиб қолади. Ҳозироқ барча керакcиз қоғозларни бир тўпламга йиғиб, эски зарядловчи қурилмаларга эргаштиринг.
Муддати ўтган косметика ва дори-дармонлар
Уйни “тартибга солиш”даги алоҳида (ва зарур) нуқта бу косметика ва дори-дармон қутиларини кўздан кечириш ва ҳар бир воситани яроқлилик муддатини текширишдир. Муддати ўтган косметик воситалар ва таблеткаларни дарҳол чиқинди қутисига ташланг.
Бузилган (ёки керакcиз) ўйинчоқлар
Уйда болалар бўлса, ўйинчоқ қутиларини ҳам диққат билан кўздан кечириш керак. Бузилган ўйинчоқларни дарҳол ташлаб юборинг, кейин эса болангиз аллақачон улғайиб ўйнамай қўйган ўйинчоқларидан ҳам халос бўлинг. Агар вақт топиб, керакcиз ўйинчоқларни энг яқин болалар уйига олиб борсангиз, жуда яхши иш қилган бўласиз.
Синган идишлар
Учлари ва ёнлари дарз кетган пиёла ёки ликопчаларни ҳам йўқ қилинг. Бундай идишлар нафақат хунук кўринади балки соғлиқ учун ҳам зарарлидир (чизилган жойлар заҳарли моддалар чиқариши мумкин).
Жуфти йўқолган нарсалар
Ўзингизга ёқадиган пайпоқ, қўлқоп ёки зиракларни қанчалик яхши кўрсангиз ҳам, уларнинг бир пойи йўқолган бўлса, қолган 1 пойини сақлашнинг маъноси йўқ.
Зерикарли китоблар
Уй кутубхонаси нафақат билим бурчаги, балки чанг йиғувчи жой ҳам ҳисобланади. Китобларни кўздан кечиринг ва қайси бирини энди ҳеч қачон қайта ўқимаслигингизни ҳал қилинг. Кейин уларни дўстларингизга улашинг, сотиб юборинг ёки китоб алмашиш жойига олиб боринг.
Изоҳ (0)