Sizga detektiv hikoyalar yoqadimi? Qiziqarli syujetli serial qidiryapsizmi? Yoki shunchaki dam olishni xohlaysizmi? Dam olish kunlarida quyidagi kulgili syujetga ega 6 ta ajoyib detektiv seriallarni tomosha qilishni tavsiya etamiz.
“Elsbet”
Advokat Elsbet Tassioni (Kerri Preston) haqidagi “Yaxshi rafiqa” filmining spin-offi shubhasiz muvaffaqiyatli bo‘ldi. Agar advokatlar haqidagi ajoyib serial “Yaxshi rafiqa”ni tomosha qilgan bo‘lsangiz, unda bosh qahramonlarning muammolarini hal qilib beradigan juda yoqimtoy va samimiy advokat Elsbet Tassioni yodingizda bo‘lsa kerak.
Elsbet Chikagodan Nyu Yorkka ko‘chib o‘tadi va politsiya kuzatuvchisi bo‘lib ishlay boshlaydi. U tergov jarayonida qonunning barcha nozik jihatlariga rioya qilinishini ta’minlashi kerak. Elsbetni rang-barang liboslari, turli-tuman sumkalari, do‘stona munosabati va xushchaqchaqligi bilan bunday ishda tasavvur qilish qiyin. Shunday qilib, politsiya xodimlari yangi xodimdan hayratda qolishadi. Ayniqsa, uning majburiyatlariga kirmasa-da, yopilib ketgan murakkab qotilliklarni fosh qila boshlaydi.
Elsbet Piter Folk ishtirokidagi unutilmas “Kolumbo” teleserialini eslatadi.
“Kasl”
Mashhur detektiv yozuvchi Richard Kasl (Natan Fillion) o‘zining eng ko‘p sotilgan romanlari uchun yangi qahramon qidirar ekan, ruhiy tushkunlik va g‘amgin bo‘lib qoladi. Bu vaqtda to‘satdan kimdir Kaslning kitoblaridagi usullardan foydalanib, qotillik qila boshlaydi. Shubha muallifga tushadi. Tergovni go‘zal detektiv Keyt Bekket (Stana Katich) olib boradi.
Aloqalari va shaxsiy jozibasidan foydalangan holda Rik Nyu York politsiya bo‘limiga ishga kiradi va Keytning sherigiga aylanadi — qiz esa bundan umuman mamnun emas.
Bir necha epizoddan so‘ng, yozuvchilik — politsiya bo‘limida vaqt o‘tkazish va Keytni bezovta qilishning asosiy sababi emasligi ayon bo‘ladi. Biroq sevgisiga iqror bo‘lishdan oldin bir necha fasl va bir nechta syujet kerak bo‘ladi. Yettinchi syujetning oltinchi qismida esa tomoshabinlarni juda hayajonli voqea kutadi.
Natan Fillion va Stana Katichning ajoyib dueti barcha 8 mavsum davomida muxlislarni quvontiradi. Yozuvchilar dramatik chiziqlarni kiritishga va serialni romantik-komediya rolidan chalg‘itishga qanchalik urinmasin, xayriyatki, muvaffaqiyatga erisha olmaydi.
“Ayollar nega qotillik qiladi?”
“Ayollar nega qotillik qiladi” — bu “Umidsiz uy bekalari” muallifi Mark Cherrining yangi durdona asari, ayollar va qotillik haqidagi kulgili, mehribon va biroz qayg‘uli hikoya. Sitkom detektiv hikoya bilan chambarchas bog‘liq bo‘lib, tomoshabin oxirigacha qotil kimligini taxmin qilishi kerak. Bu filmning nomidan aniq, lekin oxir-oqibat kim qurbon bo‘lishi ma’lum emas.
Birinchi fasl voqealari uch davrda sodir bo‘ladi: mos ravishda 1964, 1983 va 2019-yillarda. Uchala hikoyani ham bir uy va uch asosiy qahramon duch keladigan umumiy muammo — xiyonat birlashtiradi. Zodagon ayol Simone Grouv rolidagi Lyusi Lyu va ideal rafiqa Bet Enn Stenton rolidagi Jennifer Gudvinning ajoyib ijrosi, ayniqsa, diqqatga sazovordir.
Hazil-mutoyiba bo‘lishiga qaramay, serialda ayollarning jamiyatdagi o‘rni, oiladagi zo‘ravonlik, ota-ona va farzand o‘rtasidagi munosabatlarga oid zamonamiz uchun muhim bo‘lgan masalalar ko‘rib chiqiladi. Dizaynerlar 1960, 1980 va 2010-yillar uslubida uchta yorqin interyer yaratadi.
2021-yil 3-iyunda chiqqan ikkinchi fasl ham yorqin, syujetga boy va kulgili bo‘lib chiqdi. Agar birinchi mavsumda syujet voqealari uyda sodir bo‘lgan bo‘lsa, ikkinchi mavsumda barcha voqealar bog‘ atrofida aylanadi. Aniqrog‘i, bosh qahramon — o‘rta sinf vakili elita a’zolarining yopiq jamiyati bo‘lgan — bog‘dorchilik klubiga a’zo bo‘lishni xohlaydi. Albatta, bu yaxshilikka olib kelmaydi.
“Detektiv Monk”
Agar Edrian Monk (Toni Shalhub) real hayotda mavjud bo‘lganida, ehtimol, u Ginnesning rekordlar kitobiga kirgan bo‘lardi. Bitta odamning o‘zida 312 ta fobiya! Mikroblardan qo‘rqish, teginish, olomon, hayvonlar kabi juda keng tarqalgan fobiyalar orasida o‘ziga xos fobiyalar ham bor. Monk sutni xushlamaydi, faqat bitta brend suvini ichadi, Santa Klausdan qo‘rqadi, tozalikka intiluvchan, changyutkichni changyutkich bilan tozalaydi, muloqot qilishni bilmaydi va uning butun hayoti atrofidagi odamlar uchun katta muammo. Va u ajoyib detektiv.
Edrian bir vaqtlar San-Fransiskodagi eng yaxshi politsiyachi edi. Biroq uning rafiqasi Trudining fojiali o‘limi Monkning barcha psixologik fobiyalarini yanada kuchaytiradi. Uch yil davomida u uydan chiqmaydi va faqat yordamchisi Sheronning (Bitti Shrem) sa’y-harakatlari tufayli Monk asta-sekin hayotga qaytadi.
Endi uning maqsadi — politsiyaga qaytib, xotinining qotilini topish. Yaxshiyamki, uning yonida yordamchisi Sheron va so‘nggi mavsumlarda Natali Tigger (Treylor Hovard), shuningdek, uning sodiq do‘stlari kapitan Stottlmayer (Ted Levin) va leytenant Rendi Disher (Jeyson Grey-Stenford) bor.
“Shekspir va Heteuey: shaxsiy detektivlar”
Shekspir — Uilyam Shekspir, dramaturg. Heteuey — xotinining familiyasi. “Shekspir va Heteuey”da Shekspir — Luella Shekspir (Jo Joyner), sobiq sartarosh, to‘satdan detektivlik qobiliyatini payqab qoladi. Heteuey — sobiq politsiyachi Frenk Heteuey (Mark Benton) va hozirda Shakespeare & Hathaway detektiv agentligi xodimi. Syujetda hatto Marlou ham bor — u Shekspir davrida pyesalar muallifi, shuningdek, qirolicha Yelizaveta I ning maxfiy agenti bo‘lgan. Serialda u mahalliy politsiya boshlig‘i rolida.
G‘alati er-xotin atrofdagilar orasida kulgi va hayratga sabab bo‘ladi, aslida ular hayratlanarli darajada tajribali tergovchilar. Xodimlar orasida kotiba va yordamchi, yosh aktyor Sebastyan Brudenell (Patrik Uolsh Makbrayd) ham bor.
Voqealar qayerda sodir bo‘ladi? Albatta, Stratford-apon-Avonda.
“Rozmari va Taym”
Katta yoshli ikki xonim — Rozmari Bokser va Laura Taym bog‘dorchilik ilmini suv qilib ichib yuborgan xodimlar. Rododendronlarning sirli o‘limi, bog‘dagi begona o‘tlar, tomorqani tayyorlash, qimmatbaho o‘simliklarni o‘g‘irlash, qirolicha Viktoriya davridan bog‘ni zudlik bilan tiklash — Rozmari va Taym uchun hech gap emas. Ammo bu ikki xonim sirli qotilning iziga tushishga qaror qiladi.
Izoh (0)