Ilon Mask rasman dunyodagi eng boy odam va, mantiqan olib qaraganda, eng hashamatli uylarga ega bo‘lishi kerak. Biroq milliarder aksincha, hech narsaga egalik qilmaslik va biror joyga bog‘lanib qolmaslikni afzal ko‘radi. 2020-yil may oyida u Twitter’da shunday deb yozgandi: “Men deyarli barcha moddiy aktivlarimni sotaman — shaxsiy uyim bo‘lmaydi”. Milliarder o‘z so‘zida turdi — ko‘p million dollarlik hashamatli ko‘chmas mulklarini asta-sekin sotdi. Quyida avval nimalarga egalik qilgani haqida gaplashamiz.
Bumerang uy
Los Anjelesda Ilon Maskning jami yettita uyi bor. Misol uchun, uylarining biridan bolalari o‘qiydigan “o‘quv xonasi” sifatida foydalanadi — barcha uylari yaqin joyda joylashgan. O‘tgan yozda u shu uylardan to‘rttasini sotdi. Mulkning yangi egasi uchastkalarni birlashtirishni rejalashtirmoqda.
Bu uy kolleksiyaning toji hisoblanadi. Binoning arxitekturasi bumerang shaklida qurilgan bir qavatli bino.
Qanotlarning birida umumiy mehmonxona va ovqatlanish joyi mavjud, u yerdan suriladigan eshik orqali hovuzga boriladi, uning atrofida dam olish xonasi mavjud. Qarama-qarshi qanotda yotoqxonalar va hammom mavjud. Bundan tashqari, ular shunday qurilganki, har birida uyning perimetri bo‘ylab bog‘ga ochiladigan deraza mavjud. Uy fasad tomonida yerosti garajiga kirish joyi mavjud. Bino oldida isitiladigan ochiq basseyn ham bor. “Bumerang” — aqlli uy tizimiga ega: uydagi yoritish, shamollatish, isitish va audioni bevosita telefondan boshqarish mumkin.
30 million dollarlik uy
2020-yilning yozida Mask o‘zining eng qimmat uyi bilan xayrlashdi. U 2012-yilda Los Anjelesning nufuzli hududidagi uyni 17 million dollarga sotib olgandi — uy 30 mln dollarga narxlangan bo‘lsa-da, 29 mln dollarga sotildi. Uyning yangi egasi kompyuter o‘yinlari bo‘yicha biznesmen — xitoylik milliarder.
Bu mulkda avvalgisidan farqli o‘laroq, ikki qavatli kutubxona, uy teatri, keng sport zali va vino ombori mavjud.
1500 kvadrat metrlik saroyda yettita yotoqxona, jumladan, bir nechta mehmonxona mavjud. Interyer an’anaviy Amerika klassikasi uslubida bezatilgan. Uy 1990-yillarda qurilgan. Xariddan so‘ng Mask faqat kosmetik ta’mirlash bilan cheklandi — bu uyni sotib olishdan oldin ancha vaqtgacha ijaraga olgan va interyerga o‘rganib qolgandi.
Uyda tennis korti, uy atrofida esa yashil xiyobon mavjud, u yerda ochiq havoda nonushta va kechki ovqat uchun bir nechta verandalar mavjud. Garajda to‘rtta Tesla avtomobili uchun joy bor (milliarder faqat o‘z markasidagi mashinalarni haydashi sir emas).
Aktyor Jin Uaylderning uyi
Maskning Bel-Eyrdagi barcha mulklari bir tepalikda joylashgan, mazkur uy ham bundan mustasno emas. Mask uni 1971-yilda suratga olingan “Villi Vonka va shokolad fabrikasi” filmida bosh rolni o‘ynagan mashhur amerikalik aktyor Jin Uaylderdan sotib olgan.
Uaylder-Mask uyi 1951-yilda qurilgan. Bu uyni Ilon 7 million dollarga sotib olgandi. Milliarder oldi-sotdi shartnomasida o‘zgarmas shart qo‘yadi: uyning yangi egasi hech narsani o‘zgartirmaydi, chunki Mask bu qasrni o‘zgacha deb biladi.
Milliarderning o‘zi bu uydan AdAstra (lotin tilidan tarjima qilinganda “yulduzlarga”) xususiy maktabi va xodimlarining bolalari uchun foydalangan. Mazkur uyni Uaylderning jiyani sotib oladi.
Yana bir 30 million dollarlik uy
Mask sotuvga qo‘ygan yana bir katta uy Los Anjelesning ajoyib manzarasi bo‘lgan tepalikda joylashgan. U yana uchta uy bilan o‘ralgan, ular ham Maskka tegishli bo‘lib, ular ham kimoshdi savdosiga qo‘yilgan. Ushbu saroyning maydoni 2800 kv/m. Mazkur uy zamoviy interyeri bilan ajralib turadi.
Ayvonchali ixcham kottej
30 millionlik ikkinchi uyning yonida Maskka tegishli bo‘lgan yana bir kottej bor. Bu uning eng kam byudjetli mulki: milliarder uyni 4,443 million dollarga sotib olgan. (Maskning Los Anjelesdagi ko‘chmas mulkining umumiy qiymati 100 million dollarga baholangan.) An’anaviy ruhdagi kichkina uy ortiqcha hashamatsiz bezatilgan.
Kremniy vodiysidagi mulk
Nihoyat, bu Maskning Kremniy vodiysidagi uyi bo‘lib, u yerda kompaniyalarining bosh qarorgohi joylashgan. Bu sotuvga chiqarilgan mulklarning oxirgisi. Mazkur uy avvalgilaridan kattaroq — deyarli 5000 kvadrat metr — o‘nta yotoqxona, 10 ta hammom, ulkan garaj bor. Bundan tashqari, uyda bal o‘tkaziladigan zal, banket o‘lchamidagi rasmiy yemakxona va butun oshpazlar jamoasi uchun mo‘ljallangan oshxona mavjud.
Hashamatli uyda kaminli zallar, katta mebellar, billur qandillar va devorlarda turli xil kartinalar mavjud. Konsollar va xitoy vazalari bo‘lgan zallar fransuz uylariga, yog‘ochdan yasalgan yemakxonalar esa Britaniya aristokratik uylariga o‘xshaydi. Xonalarda ham juda ko‘p antiqa buyumlar mavjud.
Mulk 19 gektar maydonda joylashgan. Bu yerda shaxsiy kanyon, ko‘rfaz va sog‘lomlashtiruvchi yo‘laklar bor.
Boka Chikadagi uy, Texas
Asosiy mulki sotilgandan keyin Maskning asosiy qarorgohi Texasdagi SpaceX zavodidan yarim soatlik piyoda masofada joylashgan 50 000 dollarlik yig‘ma uy hisoblanadi. “Bu raketa zavodi yonida joylashgan kichkina, juda ixcham uy. Bu yerdan ishga piyoda bora olaman”, deydi u intervyularidan birida.
Boshqa obyektlari
Milliarderga tegishli boshqa obyektlar qatorida bir nechta samolyot ham bor. Masalan, Mask Chexiyada ishlab chiqarilgan Aero L-39 Albatros jangovar o‘quv samolyotiga egalik qilgani ma’lum — bu model Varshava shartnomasiga a’zo davlatlar tomonidan 1970-yillarda ishlatilgan va 1999-yilgacha ommaviy ishlab chiqarilgan. 2005-yilda esa u Dassault Falcon 900 reaktiv samolyotini ham sotib oladi.
Izoh (0)