So‘nggi yillarda mamlakatimizda to‘qimachilik va tikuv-trikotaj sanoatini rivojlantirish, soha korxonalarining investitsiya va eksport faoliyatini qo‘llab-quvvatlash bo‘yicha kompleks chora-tadbirlar amalga oshirilishi natijasida respublikada ishlab chiqarilayotgan mahsulotlar sifati, hajmi va turlari ortib, mamlakatimizning eksport salohiyati o‘sib borayotganini ko‘rish mumkin.
O‘zbekiston Respublikasi Prezidentining 2023-yil 10-yanvardagi “Paxta-to‘qimachilik klasterlari faoliyatini qo‘llab-quvvatlash, to‘qimachilik va tikuv-trikotaj sanoatini tubdan isloh qilish hamda sohaning eksport salohiyatini yanada oshirish chora-tadbirlari to‘g‘risida”gi Farmoni, O‘zbekiston Respublikasi Prezidentining 2020-yil 21-oktabrdagi “Eksport faoliyatini moliyaviy qo‘llab-quvvatlashni yanada kengaytirish chora-tadbirlari to‘g‘risida”gi Farmoni hamda O‘zbekiston Respublikasi Prezidentining 2024-yil 14-martdagi “Tashqi savdo va hududiy sanoatni rivojlantirishda tadbirkorlar birlashmalarining rolini yanada oshirish chora-tadbirlari to‘g‘risida”gi Qaroriga asosan, Eksportni rag‘batlantirish agentligi hamda Eksportni qo‘llab-quvvatlash jamg‘armasi negizida Davlat aktivlarini boshqarish agentligi muassisligida “Savdoni rivojlantirish kompaniyasi” AJning eksportoldi moliyalashtirish mablag‘lari hisobidan “Mikrokreditbank” ATB tomonidan ajratilgan imtiyozli kredit orqali eksport rejasini ortig‘i bilan bajarayotgan korxonalar talaygina.
Ulardan biri Buxoro viloyati Romitan tumanidagi “Romstar” O‘zbekiston–Amerika qo‘shma korxonasidir. Pillani qayta ishlash korxonasi 2004-yilda ish boshlagan bo‘lib, bu yerda viloyatdagi Qorako‘l, Olot, Jondor, Romitan tumanlaridan 18 ming kasanachilar yetishtirgan pilla qabul qilinib, ipak kalavaga aylantiriladi.
Respublikamizda pillachilik sohasini rivojlantirish, ishlab chiqariladigan mahsulot turlarini kengaytirish, pillachilik korxonalarining eksport salohiyatini va investititsiya faoliyatini har tomonlama qo‘llab-quvvatlash bo‘yicha olib borilayotgan kompleks chora-tadbirlar natijasida ushbu korxonaning ham eksport salohiyati yildan yilga ortib bormoqda. 220 nafar ishchi-mutaxassisga ega “Romstar” qo‘shma korxonasida sanoat uchun qimmatbaho pilla xom ashyosini qayta ishash, pilla chuvish, qayta o‘rash, xom ipak tola va ipak momig‘ini ishlab chiqarish faoliyati yo‘lga qo‘yilgan bo‘lib, ushbu mahsulotlar asosan Xitoy, Vetnam va Eron davlatlariga eksport qilinmoqda.
Korxonaning ishlab chiqarish quvvatiga to‘xtaladigan bo‘lsak, Xitoy texnologiyasi asosida yil bo‘yi 150 tonna xom ipak tola ishlab chiqarish imkoniyatiga ega. Mavjud shart-sharoitdan kelib chiqqan holda korxonada 2023-yilda 120,3 tonna ipak tola ishlab chiqarilgan bo‘lib, buyurtmachilarga yetkazilgan ipak tola evaziga 4 milliard so‘mdan ortiq sof foyda olingan. O‘zbek ipak mahsulotlari eksportini amalga oshirish bilan shug‘ullanib kelayotgan qo‘shma korxonaning yillik hisob raqam aylanmasi 30 milliardni tashkil etadi.
Korxona rahbari Qo‘shshi Kattayevning taʼkidlashicha, u korxona faoliyatini kengaytirishda “Mikrokreditbank”ning moliyaviy ko‘magiga tayanadi. “Romstar” korxonasi hozirga qadar 18 marotaba aynan mazkur bank kredit liniyalaridan foydalangan. Korxonaning mahsulotlar eksportini qo‘llab-quvvatlash maqsadida bank tomonidan 1 000 000 AQSH dollari mikdorida 20 oy muddatga, 6 oylik imtiyozli davr bilan, 6 foizli kredit mabag‘lari ajratilgan.
“Xom ashyo va ishlab chiqarish salmog‘i oshayotgani tufayli mazkur korxona tizimidagi 6 ta pilla qabul qilish maskani modernizatsiyalash dasturiga binoan qayta rekonstruksiya qilingani hisobidan Romitan, Jondor, Qorako‘l va Olot tumanlaridagi maskanlarda jami 117 ta qo‘shimcha ish o‘rni yaratilgan. Mazkur qayta taʼmirlash ishlari uchun 8,5 milliard so‘m mablag‘ sarflangan bo‘lib, pilla yetishtirish va qabul maskanlarida saranjomlash mavsumida 4 mingga yaqin yollanma ishchi jalb qilmoqdamiz”, - deydi korxona rahbari.
Korxona o‘z oldiga aniq maqsadlar qo‘ygan. Yiliga 80 tonna ipak tolasi, 30 tonna ipak momig‘i ishlab chiqarilayotgan ushbu korxonada endilikda ipak matolari xususan, atlas to‘qish ham yo‘lga qo‘yilishi rejalashtirilgan. Xorijiy davlatlarda o‘tkaziladigan “MILANO UNICA” kabi turli xalqaro ko‘rgazmalarda ham faol ishtirok etib kelayotgan korxona Yaponiya, Italiya, Germaniya, Shveysariya, Ruminiya va Ispaniyaning yirik kompaniyalari vakillari bilan o‘zbek ipak mahsulotlari eksportini amalga oshirish hamda ipakdan tayyor mahsulotlarni ishlab chiqarish uchun O‘zbekistonda o‘zaro hamkorlikda yangi investitsiya loyihalarini yo‘lga qo‘yish yuzasidan muzokaralar olib bormoqda.
Maʼlumot o‘rnida aytish lozimki, joriy yil boshidan beri “Mikrokreditbank” ATB tomonidan tadbirkorlik subyektlarining investitsion loyihalarini moliyalashtirish uchun respublika bo‘yicha “Romstar” singari yana 95 ta loyihaga jami 384,4 mlrd. so‘m ekvivalentida mablag‘lar ajratilgan. “Mikrokreditbank” o‘zining xorijiy kredit liniyalari orqali jalb qilingan mablag‘lari bilan iqtisodiyotning real sektori korxonalarini modernizatsiya qilish va investitsiya loyihalarini moliyaviy qo‘llab-quvvatlashda davom etadi.
Reklama huquqi asosida
Izoh (0)