Futbol bo‘yicha U-23 Osiyo Kubogi doirasida O‘zbekiston 20-aprel, shanba kuni Kuvaytga qarshi bahs olib bordi.
-Zh-XEvXe.jpg)
Uchrashuvning 32-daqiqasida Alibek Davronov o‘ng qanotdan oshirilgan to‘pni boshi bilan darvozaga aniq yo‘llab, hisobni ochdi.
Birinchi taym to‘liq o‘zbekistonlik futbolchilar ustunligida o‘tdi. Ular to‘pga egalik qilish, raqib darvozasiga zarba berish borasida kuvaytlik futbolchilardan anchagina yuqori ko‘rsatkichlarni qayd etdi. Ammo birinchi taymda darvozalarga boshqa gol urilmadi.
Uchrashuvning ikkinchi taymi ham O‘zbekiston Olimpiya terma jamoasi ustunligida boshlandi. 50-daqiqada yana bir o‘zbekistonlik himoyachi Hamroaliyev Jasur Jaloliddinov uzatmasidan keyin zarba berib, o‘zbekistonliklarning ikkinchi goliga mualliflik qildi.
Besh daqiqa o‘tib Hojimat Erkinov qarshi hujumga o‘tdi va Jasur Jaloliddinovga to‘pni uzatib, qayta qabul qilib oldi. Darvozaga aniq zarba bergan Hojimat o‘zbekistonlik futbolchilarining uchinchi goliga mualliflik qildi.
Uchrashuvning 71-daqiqasida Abdurauf Bo‘riyevga nisbatan qo‘pollik sabab hakam kuvaytlik futbolchini maydondan chetlatdi. Uchrashuvning 83-daqiqasida to‘p kuvaytlik futbolchining qo‘liga tegdi. Hakam VAR bilan maslahatlashib, nuqtani ko‘rsatdi. Penaltidan zarba bergan Xolmatov hisobni 0:4 ga yetkazdi.
Uchrashuvning qo‘shib berilgan daqiqalarida o‘zbekistonlik futbolchilar yana bir bor penalti tepish imkoniyatiga ega chiqdi. Husayn Norchayevning zarbasini darvozabon qaytara oldi. Ammo 3 daqiqa o‘tib Husayn Norchayev chap qanotdan oshirilgan to‘pni darvozaga yo‘llab, o‘zbekistonliklarning beshinchi goliga mualliflik qildi.
Shu tariqa uchrashuv O‘zbekiston Olimpiya terma jamoasining yirik hisobdagi g‘alabasi bilan yakunlandi.
D guruhidan o‘rin olgan yana bir bahsda Vetnam Malayziyaga qarshi maydonga tushdi. Ikki to‘p farqi bilan g‘alaba qozongan vetnamliklar 6 ochkoga ega bo‘ldi. Shu tariqa O‘zbekiston va Vetnam keyingi bosqich masalasini hal qildi. Uchinchi tur o‘yini guruh yetakchisini aniqlab beradi.
Izoh (0)