Markaziy bank 2025-yil yanvar oyida o‘tkazilgan aholining isteʼmol kayfiyati bo‘yicha sharhini eʼlon qildi.
So‘rov ishtirokchilarining (2700 kishi) 66,4 foizi kelgusida daromadlari oshishini kutayotganini bildirgan. Daromadlari kamayishini maʼlum qilganlar esa 10,2 foiz bo‘lgan. Shu bilan birga, daromadlari o‘zgarmasligini kutayotganlar 23,2 foizga teng.
Respondentlarning 68 foizi rasmiy ish haqidan daromad olishini bildirgan.
“Stipendiya, nafaqa, dividend va depozit orqali daromad oluvchilarning ulushi ortgan bo‘lsa, tadbirkorlik va tomorqa faoliyatidan daromad topuvchilar ulushi biroz kamaygan”, deyiladi sharhda.
So‘rov natijalariga ko‘ra, kafe-restoran, savdo, ishlab chiqarish, fan-taʼlim va tashish xizmatlari sohasida ishlovchilar kelajakda oyliklari ko‘proq oshishini kutmoqda. Axborot texnologiyalari va ommaviy axborot vositalari vakillari daromadlari kamroq oshishi bo‘yicha kutilmalarini bildirgan.
Ishtirokchilardan 77 foizi kelgusi 12 oyda xarajatlari ko‘payishini bildirgan. Xarajatlari o‘zgarmasligini taʼkidlaganlar ulushi 15,2 foizni, chiqimlari qisqarishini kutayotganlar 7,8 foizni tashkil etgan.
Markaziy bankka ko‘ra, so‘rovda qatnashgan barcha daromad guruhlari kutilmalarida xarajatlar asosan uy-joy, taʼlim va avtomobil bilan bog‘liq.
Yosh guruhlari bo‘yicha asosiy xarajatlar tarkibida yoshlar (30 yoshgacha) ko‘proq taʼlim, uy-joy taʼmiri, maishiy texnika va elektron qurilmalarga mablag‘ sarflamoqda.
O‘rta yoshdagi respondentlar esa (30-50 yosh) yashash sharoitlarini yaxshilashga eʼtibor qaratmoqda. Ularning xarajatlari asosan uy-joy taʼmiri, avtomobil xaridi, to‘y va oilaviy bayramlarga yo‘naltirilgan. Shu bilan birga, bolalar taʼlimi va sog‘liqni saqlash xarajatlari ham ushbu guruh uchun muhim o‘rin tutmoqda.
Katta yoshdagilar (50 yoshdan baland) uchun yirik xaridlar hissasi kamayib, davolanish xarajatlari ortib bormoqda. Mazkur guruhda xaridlar boshqa guruh respondentlarga nisbatan tezroq kamayib bormoqda.
So‘rovda 7-10 mln so‘m hamda 15-20 mln so‘m va undan yuqori daromadga ega respondentlar kelgusida xarajatlari ko‘payishi mumkinligini taʼkidlagan. O‘z navbatida, 5-7 mln so‘m daromad oluvchilar esa xarajat qilish bo‘yicha ko‘proq ehtiyotkor yondashuvni saqlab qolmoqda.
Kelgusi 12 oyda kredit qarzdorligi miqdorini oshirishni rejalashtirayotgan respondentlar ulushi biroz o‘sib, 57 foizga teng bo‘lgan.
Jamg‘armalarining oshishini kutayotgan ishtirokchilar 62,3 foizga yetgan. Jamg‘armalari o‘zgarmasligini kutayotganlar esa 23,9 foiz, jamg‘armalari kamayishini kutayotganlar 13,8 foizni tashkil qilgan.
Izoh (0)