O‘tgan yili 10 842 nafar o‘zbekistonlik xorijiy davlatlarga doimiy yashash uchun ko‘chib ketgan. Bu haqda Statistika agentligi maʼlum qildi.
2024-yilda O‘zbekistondan chet elga ko‘chib ketganlarning asosiy qismi Qozog‘iston (8 792 kishi) va Rossiyaga (1 601 kishi) borgan. Shu bilan birga, mamlakatni tark etganlar ulushi Janubiy Koreya (96 kishi), Qirg‘iziston (73 kishi), Turkmaniston (39 kishi) va boshqa mamlakatlar (241 kishi) hissasiga to‘g‘ri kelgan.
Taqqoslash uchun, 2023-yilda xorijga doimiy yashash maqsadida ko‘chib ketgan o‘zbekistonliklar soni o‘tgan yildagidan sezilarli ko‘p (17 336 kishi) bo‘lgan. Jumladan, Qozog‘istonning o‘ziga 14 051 kishi, Rossiyaga 2 670 kishi ko‘chib ketgan.
Bundan 15 yil ilgari, yaʼni 2010-yilda O‘zbekistondan xorijga 44 420 kishi, 2011-yilda 50 816 kishi, 2012-yilda 45 447 kishi ko‘chib ketgan. 2015-yildan chetga ko‘chish trendi sezilarli pasaya boshlagan (31 765 kishi ko‘chgan).
2024-yilda O‘zbekistonga xorijiy mamlakatlardan doimiy yashash maqsadida ko‘chib kelganlar soni 2 229 kishini tashkil etgan. Shundan 813 nafari Rossiyadan, 539 nafari Qozog‘istondan bo‘lgan. Shu bilan birga, mamlakatga Tojikistondan 241 kishi, Qirg‘izistondan 153 kishi doimiy yashash uchun ko‘chgan.
Taqqoslash uchun, 2023-yilda respublikaga chet eldan 2 955 kishi ko‘chib kelgandi. Shundan 1 175 nafari Rossiyadan, 726 nafari Qozog‘istondan bo‘lgan.
Izoh (0)