Hindistonning Jammu va Kashmir shtatlarida tarqalgan noma’lum kasallik 17 kishining, shu jumladan, 13 nafar bolaning hayotiga zomin bo‘ldi.
Mahalliy hokimiyat vakillari karantin e’lon qilib, o‘lim sababini aniqlash uchun keng ko‘lamli tekshiruvni boshladi. Joriy haftaning boshida mazkur hududda 230 ga yaqin kishi karantinga olingan edi.
Kasallikning dastlabki holatlari dekabr oyi boshida qayd etilgan. Halok bo‘lganlarning barchasi bir nechta qarindosh oilalarning a’zolari bo‘lgan. Jasadlarni tekshirgan shifokorlar ularda miya va asab tizimining jiddiy zararlanganini aniqlagan.
Tergovga, shuningdek, Hindiston federal hukumati jalb qilindi. Sog‘liqni saqlash vaziri Jitendra Singxning aytishicha, dastlabki tahlillar o‘limga virus yoki bakteriya emas, balki qandaydir zahar sabab bo‘lganini ko‘rsatgan. Biroq bunday keng ko‘lamli fojiani keltirib chiqargan modda hali aniqlanmagan.
Sirli kasallikni o‘rganish jarayonida g‘arbiy Puna shahri hokimiyati kasallikning boshqa turiga duch keldi. Mazkur hududda kamida 73 ta Giyen-Barre sindromi — organizmning immun tizimi periferik asablarni zararlaydigon kamyob nevrologik kasallik holati qayd etildi. Bemorlarning ko‘pchiligi og‘ir ahvolda bo‘lib, sun’iy nafas oldirish apparatlariga ulangan.
Giyen-Barre sindromi falajlik va nafas olishda qiynalish kabi jiddiy asoratlarga olib kelishi mumkin. Shifokorlar xavotirga tushib, aholini kasallik tarqalishining oldini olish uchun ehtiyot choralariga rioya qilishga chaqirmoqda.
Har ikkala kasallik tarqalishi ham aholi orasida vahima uyg‘otdi. Tibbiyotning turli sohalaridagi mutaxassislar bu sirli kasalliklarning sabablarini aniqlash va samarali davolash usullarini ishlab chiqish uchun kuchlarini birlashtirmoqda.
Izoh (0)