Markaziy bank 2024-yil yakunida O‘zbekistonda inflyatsiya darajasi dastlab 9 foiz, keyin 9,5 foiz bo‘lishini prognoz qilgandi. Biroq yil so‘ngida inflyatsiya 9,8 foiz shakllandi. Markaziy bank raisi Timur Ishmetov jurnalistlar bilan muloqotda narxlar o‘sishi nega kutilmalardan yuqori bo‘lganiga izoh berdi.
Timur Ishmetovning aytishicha, inflyatsiya kutilganidan keyinroq pasayishiga bir qancha omillar taʼsir ko‘rsatgan.
“O‘tgan yilning oxirida inflyatsiya darajasi kutilmadan biroz baland shakllanganiga energiya narxlari erkinlashtirilishining ikkilamchi taʼsirlari, go‘sht, kartoshka, o‘simlik yog‘i taklifi bilan bog‘liq omillar taʼsir qilgan. Shu omillar sabab ikkinchi yarim yillikda inflyatsiya darajasi kutilganidan sekinroq pasaygan. Kommunal xizmatlarni hisobga olmaganda ham, xizmatlar guruhi inflyatsiyasi umumiy inflyatsiya darajasidan yuqori shakllanmoqda. Dekabr oyida aholi va tadbirkorlarda kutilmalari o‘sgan, yaʼni aholiniki 14,4 foiz, tadbirkorlarniki 13,9 foiz bo‘lgan. Kutilmalar oshishiga energiya narxlari, kommunal va almashuv kurslari o‘zgarishlari sabab bo‘lganini bildrishgan. Bu kelgusi choraklarda bazaviy inflyatsiyaga tasir etishi mumkin. Shu omillarni hisobga olib, joriy yil yakunida umumiy inflyatsiya 7-8 foiz atrofida shakllanishi prognoz qilinmoqda”, dedi Markaziy bank raisi.
Avvalroq Timur Ishmetov mazkur prognozlarda 2025-yil davomida energiya, kommunal xizmatlar va yonilg‘i tariflari oshirilishi ham hisobga olinganini aytgandi.
“Energiya va yonilg‘i narxlari o‘sishi inflyatsiya oshishiga 1,8–1,9 foiz atrofida birlamchi taʼsir qilishi kutilmoqda”, degan Markaziy bank rahbari.
2019-yildagi prezident farmonida Markaziy bankka inflyatsiyani 2021-yilda 10 foizga pasaytirish, 2023-yilda esa 5 foiz darajadagi doimiy inflyatsion maqsadni (target) o‘rnatish topshirilgan. Biroq bu maqsadga haligacha yetilgani yo‘q.
Bugungacha inflyatsiya targetlari bir necha marta o‘zgartirildi. Xususan, 2020-yilda 5 foizlik target ko‘rsatkichiga erishish muddati 2023-yilga, 2022-yildagi maqsad 2024-yil oxiriga, o‘tgan yili esa bu muddat 2025-yil ikkinchi yarmiga ko‘chirilgan.
So‘nggi prognozlarga ko‘ra, 5 foizlik inflyatsiya darajasiga 2026-yilning ikkinchi yarmida erishish kutilmoqda.
Izoh (1)
хурматли банкирлар 2016-3017 йиллари банк фоизи 12. 14. 16. булган хозир 28 фоиздан кам эмас. уйлаб куринг фойда олиш учун энг купи бн 20. 25 фоиз фойда килади барча бизнесда солиштиринг хозиргига тижорат банкларни чунтагини купайтириб халкни карз ва запретна куйиб кашшок карам киляпти. куриб чикинглар