AQSHning saylangan prezidenti Donald Tramp o‘zining shaxsiy tansoqchisi Shon Karranni Maxfiy xizmati direktori lavozimiga tayinladi. Bu haqda u Truth Social platformasida yozdi.
Karran o‘zini soyada tutishga harakat qiladi, lekin uni ko‘pincha Tramp bilan birga suratga olishadi. Tansoqchi 2024-yil 13-iyul kuni Pensilvaniyadagi saylovoldi mitingida Trampga suiqasd uyushtirilganida uni o‘qdan himoya qilgandi. O‘shanda tadbir ishtirokchilaridan biri halok bo‘lgan, yana bir necha kishi jarohatlangan.
U o‘z hayotini xavf ostiga qo‘yib, mening hayotimni qotilning o‘qidan qutqarib qolish uchun jasorat ko‘rsatdi. Ishonchim komilki, Shon Amerika Qo‘shma Shtatlari Maxfiy xizmatini har qachongidan ham kuchliroq qiladi, dedi Tramp.
“Trampga ishonchli odam kerak edi va ular Pensilvaniyadan so‘ng, shubhasiz, o‘zaro aloqa o‘rnatishgan”, dedi Jorj Bush va Barak Obama prezidentliklari davrida Maxfiy xizmatning sobiq agenti bo‘lgan Bill Geyj.
AQSH prezidentiga ko‘ra, Shon 23 yillik huquqni muhofaza qilish tajribasiga ega bo‘lib, 2001-yilda Maxfiy xizmatdagi faoliyatini Nyuark dala bo‘limida maxsus agent sifatida boshlagan. U yerda okrug uchun himoya, razvedka, tergov, xodimlarni yollash va logistik yordam ko‘rsatish vazifalarini bajargan.
Mening birinchi muddatim davomida Shon Prezidentni himoya qilish bo‘limining yordamchi maxsus agenti lavozimida ishlagan. U bir nechta himoya qilinadigan shaxslarni bevosita nazorat qilish va ularga mas’ul bo‘lish, shuningdek, mening qarorgohlarim uchun xavfsizlik rejalarini takomillashtirish vazifalarini bajargan, dedi Tramp.
Donald Tramp saylov kampaniyasi davomida ikkita suiqasdga urinishga duch keldi
13-iyul kuni Pensilvaniyadagi mitingda siyosatchi qulog‘idan yaralandi, tadbir ishtirokchilaridan biri halok bo‘ldi, yana ikki kishi jarohatlandi. Jinoyatda gumon qilinayotgan 20 yoshli Tomas Metyu Kruksni Maxfiy xizmat yo‘q qildi.
Izoh (0)