“Nazorat Uz” kanali ma’murlari Toshkent shahridagi yirik ovqatlanish tarmoqlaridan birining rahbaridan tovlamachilik qilib pul undirganlikda gumonlanmoqda.
Toshkent IIBB axborot xizmatining “Daryo”ga ma’lum qilishicha, uch kishi — 1980-yilda tug‘ilgan D.I., 1989-yilda tug‘ilgan O.M., 1987-yilda tug‘ilgan Sh.S.ga nisbatan Jinoyat kodeksining 165-moddasi 2-qismi “v” bandi (bir guruh shaxslar tomonidan oldindan til biriktirib sodir etilgan tovlamachilik) bilan jinoyat ishi qo‘zg‘atilgan.
2024-yil 21-dekabrda ularga nisbatan qamoq ehtiyot chorasi qo‘llangan.
“Nazorat Uz” resursi OAV sifatida ro‘yxatdan o‘tgan bo‘lib, ayni vaqtda Telegram kanalida 100 mingdan, YouTube kanalida 143 mingdan, Facebookdagi sahifasida esa 18 mingdan ortiq obunachi bor. Ularning sahifalarida 2024-yil 20-dekabrdan buyon hech qanday xabar qo‘yilmay kelmoqda.
2025-yil yanvar oyi o‘rtalarida “Nazorat Uz” vakillari deb aytilayotgan shaxslar va tadbirkor o‘rtasidagi suhbatlar tasvirlari va audioyozuvlari aks etgan video tarqaldi. Unda aytilishicha, “Nazorat Uz” xodimlari Toshkentdagi yirik ovqatlanish shoxobchalarining biriga kirib, ulardan mahsulot sotib olgan va ichiga hasharotlar (tarakanlar) joylashtirib, videoga olgan. Shundan so‘ng kompaniya rahbarlari bilan bog‘lanib, bu haqda Telegram kanallarida ma’lumot e’lon qilishini bildirgan.
Videoda aytilishicha, 2024-yilning sentyabrida tez yordam xodimi haydovchisi kiyimini kiyib olgan shaxs shahar shifoxonasidan video yozib, u yerga mashhur ovqatlanish tarmoqlaridan birida zaharlangan bir necha kishilar olib kelinganini aytgan. Shundan so‘ng u brend mas’ullariga mahsulotlar ichidan pashsha chiqqani aks etgan materiallarni tashlab, hisobiga pul o‘tkazib berilmasa, videolarni tarmoqqa yuklashini aytib, shantaj qilgan.
Shuningdek, videoda qayd etilishicha, kanal ma’muri ovqatlanish shoxobchasini ijtimoiy tarmoqlarda reklama qilish bo‘yicha soxta shartnoma tuzib, bu orqali 240 million so‘m pul undirishga uringan. Kompaniya 2 oy davomida 80 million so‘m pul o‘tkazgan. Keyinroq tadbirkor holat yuzasidan huquqni muhofaza qilish organlariga murojaat qilgan.
Izoh (0)