“Назорат Уз” канали маъмурлари Тошкент шаҳридаги йирик овқатланиш тармоқларидан бирининг раҳбаридан товламачилик қилиб пул ундирганликда гумонланмоқда.
Тошкент ИИББ ахборот хизматининг “Дарё”га маълум қилишича, уч киши — 1980 йилда туғилган Д.I., 1989 йилда туғилган О.М., 1987 йилда туғилган Ш.С.га нисбатан Жиноят кодексининг 165-моддаси 2-қисми “в” банди (бир гуруҳ шахслар томонидан олдиндан тил бириктириб содир этилган товламачилик) билан жиноят иши қўзғатилган.
2024 йил 21 декабрда уларга нисбатан қамоқ эҳтиёт чораси қўлланган.
“Назорат Уз” ресурси ОАВ сифатида рўйхатдан ўтган бўлиб, айни вақтда Telegram каналида 100 мингдан, YouTube каналида 143 мингдан, Facebookдаги саҳифасида эса 18 мингдан ортиқ обуначи бор. Уларнинг саҳифаларида 2024 йил 20 декабрдан буён ҳеч қандай хабар қўйилмай келмоқда.
2025 йил январь ойи ўрталарида “Назорат Уз” вакиллари деб айтилаётган шахслар ва тадбиркор ўртасидаги суҳбатлар тасвирлари ва аудиоёзувлари акс этган видео тарқалди. Унда айтилишича, “Назорат Уз” ходимлари Тошкентдаги йирик овқатланиш шохобчаларининг бирига кириб, улардан маҳсулот сотиб олган ва ичига ҳашаротлар (тараканлар) жойлаштириб, видеога олган. Шундан сўнг компания раҳбарлари билан боғланиб, бу ҳақда Telegram каналларида маълумот эълон қилишини билдирган.
Видеода айтилишича, 2024 йилнинг сентябрида тез ёрдам ходими ҳайдовчиси кийимини кийиб олган шахс шаҳар шифохонасидан видео ёзиб, у ерга машҳур овқатланиш тармоқларидан бирида заҳарланган бир неча кишилар олиб келинганини айтган. Шундан сўнг у бренд масъулларига маҳсулотлар ичидан пашша чиққани акс этган материалларни ташлаб, ҳисобига пул ўтказиб берилмаса, видеоларни тармоққа юклашини айтиб, шантаж қилган.
Шунингдек, видеода қайд этилишича, канал маъмури овқатланиш шохобчасини ижтимоий тармоқларда реклама қилиш бўйича сохта шартнома тузиб, бу орқали 240 миллион сўм пул ундиришга уринган. Компания 2 ой давомида 80 миллион сўм пул ўтказган. Кейинроқ тадбиркор ҳолат юзасидан ҳуқуқни муҳофаза қилиш органларига мурожаат қилган.
Изоҳ (0)