Ijtimoiy tarmoqlarda Qarshi shahridagi 23-umumiy o‘rta taʼlim maktab direktori tomonidan o‘quvchilarning formasi uchun pul yig‘imiga ko‘rsatma bergani haqida video tarqalgandi. Qashqadaryo viloyati Maktabgacha va maktab ta’limi boshqarmasi bunga munosabat bildirdi.
Unda ma’lum qilinishicha, o‘tkazilgan o‘rganish jarayonida aniqlanishicha, maktab direktori F.Sh. haqiqatan maktab o‘qituvchilariga 2025-yilning 21-yanvar kuni maktabning Telegram guruhiga vediomurojaat qilib, barcha o‘quvchilarga “jaket” olinishi maqsadida ko‘rsatma bergani aniqlandi. Videoda direktor o‘qituvchilarga videomurojaat yo‘llab, 70 ming so‘mdan yig‘ishni, formasi yo‘q o‘quvchini esa maktab darvozasidan tashqariga chiqarib yuborishini aytgandi.
Ushbu maktab direktoriga nisbatan boshqarma boshlig‘ining 22-yanvardagi tegishli buyrug‘iga asosan o‘rtacha oylik ish haqining 25 foizi miqdorida jarima intizomiy jazo chorasi qo‘llanildi. Shuningdek, maktab jamoasiga kelgusida ushbu holatlarga yo‘l qo‘ymaslik bo‘yicha tushuntirish berilib, maktab sinf rahbarlaridan tushuntirish xatlari olindi.
Maktabgacha va maktab taʼlimi vazirligi tomonidan 2024-yilda o‘tkazilgan matbuot anjumanida maktab formasi bo‘yicha talablarni kim belgilaydi? degan savollarga “Bugungi kunda maktab formasi bilan bog‘liq masalalar ko‘p muhokama qilinmoqda. Bilamizki, o‘quvchilarning maktab formasi va uni kiyishga bo‘lgan yagona talablar Vazirlar Mahkamasining 2018-yil 15-avgustdagi 666-sonli qarori bilan tartibga solingan. Shuningdek, vazirlikning 2023-yil 31-avgustdagi 282-sonli buyrug‘i bilan o‘quvchilarini kiyinish madaniyati bo‘yicha o‘z tavsiyalarini barcha maktablarga yetkazgan va shu asosida ular tomonidan ichki tartib-intizom qoidalari ishlab chiqilgan”, deya javob bergan edi vazir Hilola Umarova.
Qashqadaryo viloyati Maktabgacha va maktab ta’limi boshqarmasi taʼlim tashkilotida majburiy tartibda o‘quvchilarni forma kiyishiga doir pul mablag‘larini yig‘ish, tashkil etish, qat’iyan taqiqlanganini bildirib, bu kabi salbiy holatlarni keskin qoraladi.
Izoh (0)