O‘zbekiston va BAA o‘rtasida sarmoyaviy hamkorlik bo‘yicha 15 ta hujjat imzolandi. Bu haqda Investitsiyalar, sanoat va savdo vazirligi ma’lum qildi.
13-yanvar kuni Shavkat Mirziyoyevning BAAga rasmiy tashrifi arafasida Abu Dabi shahrida qo‘shma loyihalarni amalga oshirish bo‘yicha bir qator ikki tomonlama hujjatlarni imzolash marosimi bo‘lib o‘tdi. Tadbirda mamlakatlar delegatsiyalariga O‘zbekiston tomonidan investitsiyalar, sanoat va savdo vaziri Laziz Kudratov hamda BAA tomonidan usbu davlatning energetika va infratuzilma vaziri Suhail Mohamed al Mazrui boshchilik qildi.
Qayd etilishicha, 2021-yildan buyon BAA va O‘zbekiston o‘rtasidagi ikki tomonlama savdo hajmi yiliga o‘rtacha 20 foizdan ko‘proqqa oshib bormoqda va 2024-yil yakuniga ko‘ra bu ko‘rsatkich 650 million dollarga yetdi. Bugungi kunda O‘zbekistonda BAA kapitali ishtirokidagi 337 ta korxona faoliyat ko‘rsatmoqda, shundan 114 tasi qo‘shma korxona va 223 tasi 100 foiz xorijiy korxonalardir. 2023-yilda O‘zbekistonda loyihalarni amalga oshirishga 1,08 milliard dollar, 2024-yilda esa 1,5 milliard dollardan ortiq BAA investitsiyalari o‘zlashtirildi.
Birgalikda tatbiq etilayotgan loyihalar anʼanaviy va muqobil energiya, infratuzilma, kimyo sanoati, geologiya, IT, qishloq xo‘jaligi, transport va logistika sohalarini qamrab oladi.
“O‘zbekiston—BAA” investitsiya kompaniyasi tashkil etilgan bo‘lib, uning investitsiya portfeli bugunga kelib tibbiyot, geologiya, qishloq xo‘jaligi va turizm sohalarida umumiy qiymati 192,5 million dollar bo‘lgan 7 ta loyihani tashkil etmoqda. 140 million dollarlik 9 ta loyiha ishlab chiqilmoqda. Biroq erishilgan natijalar ikki davlatning iqtisodiy salohiyatini umuman aks ettirmaydi, shu bois hamkorlik hajmini yanada oshirish bo‘yicha qo‘shimcha kompleks choralar ko‘rilmoqda.
Uchrashuvda sarmoyaviy hamkorlik bo‘yicha yana 15 ta kelishuv imzolandi. Bular AMEA Power, Masdar, Solar Power Shine, M42, Burjeel” Holdings, IFFCO Group,“TWS, Alserkal Group, Metito, AD Ports, Jetex, Emirates Group va boshqa kompaniyalar bilan energetika, sog‘liqni saqlash, qishloq xo‘jaligi, infratuzilmani rivojlantirish, suv taʼminoti, transport, logistika sohalaridagi investitsiya bitimlari va shartnomalardir.
Izoh (0)