Xonanda Munisa Rizayeva “X-faktor” loyihasida ishtirok etgan zominlik muzqaymoq sotuvchisi Fazliddin Abduvohidovga mehri tushgani va u yigit unga shukr qilishni o‘rgatgani haqida gapirdi.
— “X-faktor” loyihasida hakamlar hayʼati aʼzolarining yoniga ishtirokchilarning tarjimayi holi yozilgan qog‘ozlar ham qo‘yiladi. Fazliddin tarjimayi holida “Orzum — to‘yib ovqatlanish” deb yozib qo‘ygan ekan. Umrimda bunday orzuni eshitmaganim uchun g‘alati ahvolga tushdim.
Hayotda insonlarga yordam berishga hamisha harakat qilaman. Lekin kimgadir yordam berayotganimni Instagram’ga chiqarib, omma bilan bo‘lishmayman. Chunki dodam va otam “Bu dunyoda insondan faqat yaxshilik qoladi”, deb uqtirishgan. Fazliddinning muammosini men hal qilib bermayman, shunchaki jamoamda ishlab, pul topib ro‘zg‘orini qilishiga imkoniyat yaratib beraman. Shu kungacha u bolani jamoamga olganimdan umuman afsuslanmadim. Bir kuni “Fazliddin, oying kasal-ku, senga qancha pul beray?” deb so‘radim. U “Yo‘g‘ey opa, qanaqa pul, uyat-ku, meni ish bilan taʼminlaganingizning o‘zi men uchun katta baxt, o‘zim pul topib, onamning dori-darmonini olib beraman”, dedi.
Ammo baʼzi odamlar uning aktyorlik mahorati kuchli ekanini aytib, atayin yig‘lab berdi, deb o‘ylashyapti. Ishoninglar, uning aktyorlik mahorati nolga teng. Bu bola haqiqatan ham sodda, samimiy va u ko‘p narsani tushunmaydi. U “X-faktor” loyihasiga o‘tganidan haligacha shokda. Xalq uni qo‘llab-quvvatladi, men Argentinada o‘tiribman, xonanda Shahriyor yoki Lola pul uchun uni qo‘llab-quvvatlashmaydi. Ularning puli o‘ziga yetarli. Mana shunday gaplar eshitganda u uchun ham xafa bo‘ldim. U bola uxlamaydi, ertalabdan kechgacha vokal bilan shug‘ullanadi. “Opa, men qurilishda ishlaganman, bunaqa narsalarni tushunmayman, loyihadan chiqib ketaman”, deydi. “Nega loyihani tark etasan, axir qanchadan qancha odamlar senga ovoz beryapti”, deb urishaman.
Xonanda bir paytlar mish-mishlar uni charchatgani va ruhiy tushkunlikka tushgan kunlarini esladi.
— Odamlar men haqimda har-xil gap-so‘zlar qilishdi. 15 yil davomida qanday sinovlardan o‘tganimni o‘zim yaxshi bilaman. Lekin o‘sha vaziyatda men o‘zimni 8-qavatdan tashlamadim, o‘zimni osib qo‘ymadim va shou-biznesdan ketmadim. Ammo ko‘p marta ruhiy depressiyalarga uchradim. Ammo atrofdagilar buni sezishmaydi, chunki men ularga qiynalganimni ko‘rsatishni istamayman. Qiynalayotganimni ko‘rsa, dushmanlarim xursand bo‘lishadi, odamlar “Demak, Munisa kuchli emas ekan”, degan xulosaga borishadi.
Odamlar qanday bo‘lsa, atrofdagilarni ham xuddi shunday deb biladi. Atrofdagilarda yaxshilikni ko‘rolmayaptimi, demak, uning ko‘ngli kir. Fazliddin juda ko‘p qiyinchiliklarni ko‘radi, ammo hamisha shukr qilib yashaydi. Men o‘sha boladan ana shu jihatlarni o‘rgandim.
Munisa Rizayeva Fazliddin Abduvohidov bilan duet kuylash niyati bor-yo‘qligi va uning kelajagini qanday ko‘rolishi haqida gapirdi.
— U bilan duet kuylaymanmi-yo‘qmi, buni vaqt ko‘rsatadi. Hozir birinchi navbatda u vokal mashg‘ulotlarida toblanishi kerak. Jenisbek Piyazov u bilan ko‘p vaqt ishladi. Unga yordam berish uchun hech kimdan yordam so‘rayotganim yo‘q. Yoki bu bolaning og‘irligi hech kimga tushmayapti. U boladan piar sifatida foydalanayotganim yoki rahmat degan so‘zini kutayotganim yo‘q. Kelajakda hayotini o‘nglab olsa va o‘z o‘rnini topsa, shuning o‘zi katta yutuq, deydi xonanda.
Izoh (0)