O‘zbek shou-biznesida xonanda Mirjalol Neʼmatov nomining paydo bo‘lganiga ko‘p bo‘lgani yo‘q. U bugungi kunda ijtimoiy tarmoqlarda eng ko‘p izlanadigan va har bitta klipi millionlab tomoshabinlar eʼtiboriga tushgan sanoqli xonandalardan biri. Xo‘sh, Mirjalol Neʼmatov o‘zi kim? Keling, quyida bu savolga javob izlashga urinamiz.
“O‘g‘ling sanʼatkor bo‘lolmaydi, pulsiz hech nimaga erishmaydi”
Mirjalol Neʼmatov tug‘ilgan yilini yashiradigan xonandalar toifasiga kiradi. U shu kungacha birorta intervyusida yoshi bilan bog‘liq savollarga javob bermagan.
— Navoiydagi oddiy, kamtarona hayot kechiradigan oilada tug‘ilganman. Singlim va ukam bor. Otam ustachilik bilan, onam esa Navoiydagi markaziy kasalxonada oddiy hamshira bo‘lib ishlagan. Oilamizda sanʼatkorlar yo‘q. Ammo onam bolaligida hofiza bo‘lishni orzu qilgan ekan. Uning shirali ovozi bor, qarindoshlarimiz to‘y-hashamlarda “Siz ham bir kuylab bering”, deb mikrofon tutishardi. Oila qurib, orzulari sarobga aylangach, onam mening xonanda bo‘lishimni istadi. “O‘g‘ling sanʼatkor bo‘lolmaydi, pulsiz hech nimaga erishmaydi”, deyishganida ham menga ishonch bergan onam bo‘ladi, deydi Mirjalol Neʼmatov.
“Otam meni o‘qitish uchun Rossiyada ishlagan”
Mirjalol Neʼmatov Toshkentga kelishi va moliyaviy qiyinchiliklarga uchragan kunlarini quyidagicha eslaydi.
— O‘zbekiston davlat sanʼat va madaniyat institutining “Musiqali drama aktyorligi fakultetiga o‘qishga qabul qilinganman. Ammo testlarda past ball to‘plaganim uchun shartnoma asosida o‘qishimga to‘g‘ri keldi. Oddiy, oylikka kun ko‘radigan oila edik. “Shartnoma asosida o‘qimayman”, deganimda ota-onam amallaymiz, deyishdi. O‘qishga kirgan yilim otam shartnoma pulini ishlab topish uchun Rossiyaga ishlagani ketdi. U yerda nima ish qilgani va qanday qiyin kunlarni boshdan kechirganini eslagim ham kelmaydi. Hamma viloyatlik talabalar singari ijara uyda yashaganman, baʼzan cho‘ntagimda 10 ming so‘m pulim ham bo‘lmagan. Hozir ko‘pchilik “Ikki-uch yilda mashhurlikka erishdingiz”, deydi. Aslida ijodni boshlaganimga 10 yildan ko‘proq bo‘ldi, faqat o‘zimni mustaqil ijodkor sifatida olib chiqolmaganman, deydi Mirjalol Neʼmatov.
“Teatrga ishga olishmagan”
Mirjalol Neʼmatov teatrga ishga olinmagani va ota-onasini aldab, ofitsiantlik qilgan kunlarini quyidagicha eslaydi.
— Shartnoma asosida o‘qishni tamomlab, ishga olishar degan umidda Muqimiy nomidagi musiqali drama teatriga ish so‘rab borganman. Ammo turli bahonalar bilan ishga olishmagan. Aslida-ku, u yerning oyligi u qadar ko‘p emasdi, ammo to‘rt yil o‘qib, o‘z mutaxassisligim bo‘yicha ishlolmaymanmi, deb achinganman. Diplomim bo‘yicha ish topolmay, ofitsiantlik qilishimga to‘g‘ri kelgan. Puldan qiynalib yurganimni sezgan ota-onam “Navoiyga qayt, Toshkentda tentirab yurma”, deyishgan. O‘shanda ofitsiant bo‘lib ishlayotganimni aytishga uyalib, “Madaniyat uyiga ishga kirdim, menda hammasi yaxshi”, deb aldardim, deydi Mirjalol Neʼmatov.
“Pulsizlik sabab sevgim rad etilgan”
Ayriliq haqida ko‘p kuylovchi xonanda Mirjalol Neʼmatov pulsizligi sabab sevgisi rad etilgani va hozir u qiz haqida eslashni ham istamasligi haqida gapirdi.
— Menimcha, sevgi bir tomonlama bo‘lgan, agar bunday bo‘lmaganida, hech qanday sabab bizni ayirmagan bo‘lardi. Sharoitim yo‘qligini va qachondir hammasi yaxshi bo‘lishini tushuntirganman, ammo rad javobini bergan. Pulsizligim sabab sevgim ham rad etilgan. Hozir u haqida bilishni ham istamayman. Muhabbatiga sodiq insonman. Peshanamda boshqa inson yozilgan ekan, u bilan oila qurdim, deydi Mirjalol Neʼmatov.
“Meni haqorat qilgan”
Xonanda Yorqinxo‘ja Umarovning jamoasida ishlagani va undan achchiq gap eshitgan kunini quyidagicha eslaydi.
— Bir yilga yaqin Yorqinxo‘ja Umarovning to‘y xizmatlarida ikkinchi hofiz sifatida ishlaganman. Yaʼni u charchasa va navbatchi to‘yimizda “birrov”larga borib kelishi kerak bo‘lsa, men qo‘shiq aytib turardim. Yorqinxo‘ja bilan aslida tengdoshmiz, ammo u mashhurlikka erishib bo‘lgandi. U “birrov”ga ketsa, to‘y egalari “Bunaqasiga kelishmagandik, nega bu bola qo‘shiq aytyapti”, deb norozi bo‘lishgan paytlari ham bo‘lgan. Yorqinxo‘ja jonli kuylagani uchun chanqab qolardi, bu paytda sovuq suv ichish mumkin emas. Unga iliq qaynatilgan suv berardik. Bir to‘yda eʼtiborsizlik qilib, unga meʼyoridan issiqroq suvni berib yuborganman. Og‘zi kuyib, meni haqorat qilgan. Ammo jamoadan ketishimga bu voqea sabab bo‘lmagan. Jamoa aʼzolari bilan kelisholmay qolganman va haydalganman, deydi Mirjalol Neʼmatov.
“Essiz, o‘zim ijro etsam bo‘lar ekan”
Mirjalol Neʼmatov xonanda sifatida tanilguniga qadar ko‘p sanʼatkorlarga qo‘shiq yozib bergani va Shohruxxonga sotgan qo‘shig‘ini o‘zi ijro etmaganiga afsuslanishi haqida gapirdi.
— Shu kungacha juda ko‘p xonandalarga qo‘shiq yozib berganman. Munisa Rizayeva, Rayhon, Ziyoda, Shohruxxon, Yulduz Turdiyeva, Dildora Niyozova bilan doimiy hamkorlik qilardim. Shohruxxonga “Yurak” nomli qo‘shiqni yozib berganman va kutilmaganda u mashhurlikka erishib ketgan. O‘shanda “Essiz, o‘zim ijro etsam bo‘lar ekan”, degan fikr xayolimdan o‘tgan. Ammo nasiba degan narsa bor, uning ustiga o‘sha paytda mustaqil qo‘shiq ijro etadigan ahvolda emasdim. Shohruxxonning yordamchisi menga 500 AQSH dollari bergan va o‘sha puldan 100 dollarini uyga jo‘natganman. Bu 23 yoshga kirib oilamga bergan ilk yordamim edi, deydi xonanda.
“Hamdam Sobirov akangizmi?”
Mirjalol Neʼmatov ustozi Hamdam Sobirov bilan tanishuvi va u bilan yaratilgan duet tarixi haqida gapirdi.
— Hamdam Sobirov bilan bir viloyatdan bo‘lsak ham, avval bir-birimizni tanimasdik. Musiqa bastalashim haqida eshitib, meni chaqirtirgan. Ijodiy suhbat qilganmiz, keyin “Holimga qara” va “Darak ber” nomli qo‘shiqlarni tayyorlab berganman. Duet aytish taklifi esa mendan chiqqan va u muxlislarga manzur bo‘lgan. Ko‘pchilik bizni aka-ukaga o‘xshatadi, haqiqatan, ijodimiz ham, kiyinish uslubimiz ham bir-biriga o‘xshash. Ikkimiz ham erkinlikni yaxshi ko‘ramiz, deydi xonanda.
“Endi qo‘shiqlarimni boshqa xonandalarga bermayman”
Mirjalol Neʼmatov endi boshqa xonandalarga qo‘shiq yozishni istamasligi haqida maʼlum qildi.
— Ilgari mustaqil xonanda bo‘lib, qo‘shiq va klip yaratishga imkoniyatim bo‘lmagan. Hozir hammasi joyida. Shu bois o‘zim yaratgan qo‘shiqlarni boshqa xonandalarga bermayapman, deydi xonanda.
Izoh (0)