Instagramda “Jasjan” nomi bilan tanilgan bloger Jasur Shodiyev hojatxona qog‘ozlari bilan ekologiyaga zarar yetkazgani uchun jarimaga tortildi. Bu haqda Ekologiya vazirligi xabar berdi.
Bloger hojatxona qog‘ozlarini yig‘ib, ustiga chiqqani, ostidan esa mashina o‘tib ketayotguncha sakragani aks etgan videoni tarmoqdagi sahifasiga joylagan. Hayot uchun xavfli holat aks etgan videodan so‘ng bloger har tarafga sochilgan qog‘ozlarni yig‘masdan ketgan. Video ijtimoiy tarmoq foydalanuvchilarining keskin e’tirozlariga sabab bo‘lgan.
Mazkur holat Ekologiya, atrof-muhitni muhofaza qilish va iqlim o’zgarishi vazirligi hamda Toshkent shahar IIBB tomonidan o’rganilgan. Natijada Shodiyev atrof-muhitni ifloslantirib, belgilanmagan joyga chiqindi tashlash bilan bog‘liq huquqbuzarlikni qasddan, jamoaviy sodir etgani aniqlangan.
Unga nisbatan Ma’muriy javobgarlik to’g’risidagi kodeksning 91-moddasi 1-qismi bilan bayonnoma rasmiylashtirilgan. Huquqbuzar bazaviy hisoblash miqdorining 5 baravari — 1 million 875 ming so’m miqdorida jarimaga tortilgan.
Ta’kidlanishicha, avval ham Shodiyev tomonidan shunday huquqbuzarlik sodir etilgan. Hozirda ichki ishlar organlari tomonidan holatga huquqiy baho berilmoqda va qat’iy choralar ko‘riladi. Blogerning hamrohlari shaxsiga ham aniqlik kiritilmoqda, ularga ham qonuniy chora ko‘riladi.
2025-yil “Atrof-muhitni asrash va “yashil” iqtisodiyot yili” deb e’lon qilingan. Bu esa atrof-muhitni muhofaza qilish eng muhim masalalardan biri ekanini anglatadi. Bu boradagi har qanday huquqbuzarlik qat’iy javobgarlikka sabab bo‘ladi, deya ta’kidlaydi Ekologiya vazirligi.
Izoh (0)