Vazirlar Mahkamasining 30-noyabrdagi qarori bilan “Yashil makon” umummilliy loyihasi doirasida amalga oshiriladigan tadbirlarni qo‘llab-quvvatlash choralari belgilandi.
Unga ko‘ra, prezidentning 2023-yil noyabr oyidagi farmoniga muvofiq 2025-yil 1-martdan boshlab jismoniy va yuridik shaxslar tomonidan ixtiyoriy ravishda “Yashil to‘lov” xayriya to‘lovlarini “Yashil olam” va “Yashil to‘lov” platformalari orqali amalga oshirish imkoniyati yaratiladi.
Ekologiya, atrof-muhitni muhofaza qilish va iqlim o‘zgarishi vazirligi huzurida yuridik shaxs tashkil etmagan holda, Yashil to‘lov platformasi orqali respublikada daraxt va buta ko‘chatlarini ekishga aholini keng jalb qilish bo‘yicha Yashil xayriya jamg‘armasi tashkil etiladi.
Jismoniy va yuridik shaxslar tomonidan amalga oshirilgan “Yashil to‘lov” xayriya to‘lovlari Yashil xayriya jamg‘armasida jamlanadi. Bunda “Yashil olam” elektron platformasi orqali amalga oshirilgan xayriya to‘lovlari Yashil xayriya jamg‘armasining alohida hisobvarag‘iga yo‘naltiriladi.
Jamg‘arma mablag‘lari quyidagilarni moliyalashtirishga yo‘naltiriladi:
- daraxt va butalar ekish uchun ajratilgan yer uchastkalarini tayyorlash;
- daraxt va butalar ekish bo‘yicha loyiha-smeta hujjatlarini ishlab chiqish;
- daraxt va butalar ekilgan uchastkalarda sug‘orish tizimlarini o‘rnatish;
- daraxt, buta va qalamchalarni xarid qilish;
- hududni obodonlashtirish, dendrariylar, “yashil bog‘lar”, “yashil jamoat bog‘lari”, “yashil qalqon” va “yashil kamar” barpo etish ishlari;
- ekilgan ko‘chatlarni uch yil davomida saqlash ishlari;
- yirik o‘lchamli daraxt va butalarni yetishtirish hamda yetkazib berish.
Yashil xayriya jamg‘armasiga kelib tushgan mablag‘lar ochiqlik va jamoatchilikka hisobdorlik tamoyillari asosida foydalaniladi.
2025-yil 1-iyunga qadar Milliy yashil farovonlik fondining elektron ma’lumotlar bazasi shakllantiriladi va Davlat o‘rmon fondiga kiruvchi daraxt va butalar to‘g‘risidagi ma’lumotlarni o‘z ichiga olgan o‘simlik dunyosi obyektlarining davlat kadastri yuritiladi.
“Yashil makon” umummilliy loyihasi haqida
O‘zbekistonda ushbu umummilliy loyiha uch yil avval boshlandi. Qo‘shni mamlakatlar bilan birgalikda Mintaqaviy iqlim strategiyasini amalga oshirishga kirishildi. Toshkentda Markaziy Osiyo atrof-muhit va iqlim o‘zgarishlarini o‘rganish universiteti tashkil etildi.
“Yashil makon” dasturi uchun 2025-yilda 100 milliard so‘m ajratiladi. Daraxtlarni 3 yil parvarishlash, kasallikdan saqlash, sug‘orish xarajatlari ham investitsiya dasturiga kiritiladi. 2024-yilda jami 200 mln, shundan bahor mavsumida 125 million tup ko‘chat ekilishi belgilangan bo‘lib, bahor mavsumida 138,1 million tup (110,5 foiz) daraxt ko‘chatlari ekilgan.
Fuqarolar fikr-mulohazalari, xohish-istaklarini atroflicha o‘rganib, bildirilgan tavsiyalardan kelib chiqqan holda, bu boradagi ishlarni yangi, yanada yuksak bosqichga ko‘tarish maqsadida Shavkat Mirziyoyev 2025-yilni O‘zbekistonda “Atrof-muhitni asrash va yashil iqtisodiyot yili” deb e’lon qilishni taklif qildi.
Izoh (0)