Daraxtlarga turli yo‘llar bilan — tagiga “solyarka”, ohak quyish, ildiziga shikast yetkazish, suvsiz qoldirish, somon yoqish orqali daraxtlarni yoqib yuborish holatlari uchrab turibdi. Bu haqda Senatning ellik to‘qqizinchi yalpi majlisida ekologiya vaziri o‘rinbosari Jusipbek Kazbekov aytib o‘tdi.
Majlisda “O‘zbekiston Respublikasining ayrim qonun hujjatlariga hayvonot va o‘simlik dunyosining muhofazasini kuchaytirishga qaratilgan qo‘shimcha va o‘zgartirishlar kiritish to‘g‘risida”gi qonun ko‘rib chiqildi.
Jusipbek Kazbekovning ma’lum qilishicha, 2022-yilda 1637 ta, 2023-yilda 1522 ta, joriy yilning 8 oyida 520 ta holatda sarxatlarga shikast yetkazish holatlari kuzatilgan. Bu bo‘yicha 9 milliard 423 million, tabiatga yetkazilgan qoplash bo‘yicha 3 milliard 894 million so‘m jarima qo‘llanilgan.
O‘rmon izlanish tadqiqot instituti tomonidan yirik o‘lchamli manzarali daraxtlarni ko‘chirib o‘tkazish bo‘yicha texnikasi va texnologiyasi bo‘yicha qo‘llanmalar qilingan. Bundan tashqari Ekologiya vazirligi Fanlar akademiyasining Botanika instituti bilan hamkorlikda qo‘llanma ustida ishlanmoqda. Lekin bular mutaxassislarga berilgan tavsiyalar.
Asosiy muammo shundan iboratki, ko‘chirib o‘tkazishda pala-partish ishlash va yo‘lda daraxtlarning yo‘q bo‘lib ketish holatlari ham bor. Buxoroda ham shunday holat bo‘ldi, hozirda bu ishni prokuraturaga topshirganmiz. Bunda 1 milliard so‘mdan ortiq daraxtlar yo‘q bo‘lib ketgan, dedi vazir o‘rinbosari.
Uning qo‘shimcha qilishicha, Ekologiya vazirligi va boshqa idoralar bilan hamkorlikda o‘rmon fondiga kirmaydigan manzarali daraxtlarni ko‘chirib o‘tqazishni tartibga soluvchi normativ hujjat loyihasi ishlab chiqilmoqda.
Izoh (0)