Bu yil Maktabgacha va maktab ta’limi vazirligi tomonidan maktab o‘quvchilari uchun ikkita yirik yangi loyihaga qo‘l urildi. Ulardan biri “Turon” maktab teatri bo‘lsa, ikkinchisi “Jadidlar izidan” respublika tanlovlaridir.
“Jadidlar izidan” tanlovi buyuk jadid alloma, adib hamda mutafakkirlarning boy merosini keng targ‘ib qilish va o‘rganish orqali o‘quvchilarni kitobxonlikka jalb qilish, ma’naviy dunyosini boyitish maqsadida joriy etildi.
Tanlov orqali o‘quvchilarning bo‘sh vaqtlarini mazmunli tashkil etish, iqtidorli bolalarni aniqlash va qo‘llab-quvvatlash maqsadida tajriba-sinov tariqasida 208 ta tuman-shaharlarda “Jadidlar izidan” to‘garaklari faoliyati yo‘lga qo‘yildi. Ushbu to‘garaklar 72 soatga mo‘ljallangan bo‘lib, o‘quv dasturda belgilangan mavzular asosida to‘garak rahbari tomonidan mashg‘ulotlar olib boriladi.
O‘quv dasturida tanlovda keltirilgan jadid namoyondalari – G‘ulom Zafariy, Munavvarqori Abdurashidxonov, Abdulla Qodiriy, Abdurauf Fitrat, Is’hoqxonto‘ra Ibrat, Abdulla Avloniy, Abdulhamid Cho‘lpon, Mahmudxo‘ja Behbudiylarning hayoti va ijodi keng o‘rganiladi. Bir so‘z bilan aytganda, to‘garak a’zolari ham ma’naviy olamini boyitadi, ham tanlovda muvaffaqiyatli ishtirok etishlariga zamin yaratadi.
Mazkur tanlov uch bosqichni – tuman (shahar), hududiy va respublika bosqichlarini o‘z ichiga oladi. Tanlovda 2-sinf (6-8-sinf va 9-10-sinf) toifasidagi o‘quvchilari o‘rtasida Nizomda ko‘rsatilgan shartlar asosida tashkil etiladi.
Ilk bora tashkil etilgan tanlovda davlat va xususiy ta’lim muassasalarining 6-10-sinflarida tahsil olayotgan 364 906 nafar o‘quvchi ishtirok etish istagini bildirib, “jadidlarizidan.uz” sayti orqali ro‘yxatdan o‘tkazildi. Hududlar kesimida olib qaralganda eng ko‘p ishtirokchilar soni Xorazm, Andijon va Farg‘ona viloyatlariga to‘g‘ri keldi.
28-30-oktyabr kunlari ishtirokchilar dastlab sektorlar kesimida saralanib, ulardan 13 299 nafari tuman bosqichiga yo‘l oldi. 31-oktyabr kuni esa respublikaning barcha hududlarida bir vaqtning o‘zida tuman-shahar bosqichiga start berildi. Har bir toifa bo‘yicha eng yuqori natijani qo‘lga kiritgan bir nafardan ishtirokchi keyingi bosqichda ishtirok etish huquqini qo‘lga kiritdi.
Tanlovning hududiy bosqichi 13-23-noyabr kunlari hududlarda joylashgan 9 ta ijodiy maktablarda, 2 ta umumta’lim maktabida, 2 ta uy muzeyi va axborot-kutubxona markazida o‘tkazildi.
Tuman-shahar bosqichlaridan muvaffaqiyatli o‘tgan 416 nafar ishtirokchi qatnashdi. “Boshqotirma”, “Jadidlar hayoti va ijodi”, “Asar tahlili” kabi uchta shart asosida eng yuqori ball to‘plagan bir nafardan ishtirokchi yakuniy bosqichga yo‘llanmani qo‘lga kiritdi.
Ta’kidlash kerakki, har bir hududda tanlovning shaffofligini ta’minlash maqsadida filologiya fanlari doktori, professor Bahodir Karimov, tarix fanlari bo‘yicha falsafa doktori, jadidshunos Bahrom Irzayev, filologiya fanlari doktori Shahnoza Nazarova, filologiya fanlari bo‘yicha falsafa doktori Javlonbek Jovliyev kabi ekspertlar jalb etildi.
Tanlovning respublika bosqichi dekabr oyining oxirgi o‘n kunligida o‘tkazish rejalashtirilgan. Respublika bosqichida har bir sinf toifasi bo‘yicha eng yuqori ball to‘plagan 7 nafardan (I, II, III o‘rin g‘oliblari hamda eng yuqori ball to‘plagan 4 nafar) jami 14 nafar ishtirokchilar xorijiy davlatga ta’lim sayohatiga yuboriladi.
Izoh (0)