Ўзбекистондаги 208 та туман ва шаҳарларда “Жадидлар изидан” тўгараклари фаолияти йўлга қўйилди

Бу йил Мактабгача ва мактаб таълими вазирлиги томонидан мактаб ўқувчилари учун иккита йирик янги лойиҳага қўл урилди. Улардан бири “Турон” мактаб театри бўлса, иккинчиси “Жадидлар изидан” республика танловларидир. 

“Жадидлар изидан” танлови буюк жадид аллома, адиб ҳамда мутафаккирларнинг бой меросини кенг тарғиб қилиш ва ўрганиш орқали ўқувчиларни китобхонликка жалб қилиш, маънавий дунёсини бойитиш мақсадида жорий этилди.

Танлов орқали ўқувчиларнинг бўш вақтларини мазмунли ташкил этиш, иқтидорли болаларни аниқлаш ва қўллаб-қувватлаш мақсадида тажриба-синов тариқасида 208 та туман-шаҳарларда “Жадидлар изидан” тўгараклари фаолияти йўлга қўйилди. Ушбу тўгараклар 72 соатга мўлжалланган бўлиб, ўқув дастурда белгиланган мавзулар асосида тўгарак раҳбари томонидан машғулотлар олиб борилади. 

Ўқув дастурида танловда келтирилган жадид намоёндалари – Ғулом Зафарий, Мунавварқори Абдурашидхонов, Абдулла Қодирий, Абдурауф Фитрат, Исъҳоқхонтўра Ибрат, Абдулла Авлоний, Абдулҳамид Чўлпон, Маҳмудхўжа Беҳбудийларнинг ҳаёти ва ижоди кенг ўрганилади. Бир сўз билан айтганда, тўгарак аъзолари ҳам маънавий оламини бойитади, ҳам танловда муваффақиятли иштирок этишларига замин яратади. 

Мазкур танлов уч босқични – туман (шаҳар), ҳудудий ва республика босқичларини ўз ичига олади. Танловда 2-синф (6-8-синф ва 9-10-синф) тоифасидаги ўқувчилари ўртасида Низомда кўрсатилган шартлар асосида ташкил этилади.

Илк бора ташкил этилган танловда давлат ва хусусий таълим муассасаларининг 6-10-синфларида таҳсил олаётган 364 906 нафар ўқувчи иштирок этиш истагини билдириб, “жадидларизидан.уз” сайти орқали рўйхатдан ўтказилди. Ҳудудлар кесимида олиб қаралганда энг кўп иштирокчилар сони Хоразм, Андижон ва Фарғона вилоятларига тўғри келди. 

28-30 октябрь кунлари иштирокчилар дастлаб секторлар кесимида сараланиб, улардан 13 299 нафари туман босқичига йўл олди. 31 октябрь куни эса республиканинг барча ҳудудларида бир вақтнинг ўзида туман-шаҳар босқичига старт берилди. Ҳар бир тоифа бўйича энг юқори натижани қўлга киритган бир нафардан иштирокчи кейинги босқичда иштирок этиш ҳуқуқини қўлга киритди. 

Танловнинг ҳудудий босқичи 13-23 ноябрь кунлари ҳудудларда жойлашган 9 та ижодий мактабларда, 2 та умумтаълим мактабида, 2 та уй музейи ва ахборот-кутубхона марказида ўтказилди.

Туман-шаҳар босқичларидан муваффақиятли ўтган 416 нафар иштирокчи қатнашди. “Бошқотирма”, “Жадидлар ҳаёти ва ижоди”, “Асар таҳлили” каби учта шарт асосида энг юқори балл тўплаган бир нафардан иштирокчи якуний босқичга йўлланмани қўлга киритди.

Таъкидлаш керакки, ҳар бир ҳудудда танловнинг шаффофлигини таъминлаш мақсадида филология фанлари доктори, профессор Баҳодир Каримов, тарих фанлари бўйича фалсафа доктори, жадидшунос Баҳром Ирзаев, филология фанлари доктори Шаҳноза Назарова, филология фанлари бўйича фалсафа доктори Жавлонбек Жовлиев каби экспертлар жалб этилди. 

Танловнинг республика босқичи декабрь ойининг охирги ўн кунлигида ўтказиш режалаштирилган. Республика босқичида ҳар бир синф тоифаси бўйича энг юқори балл тўплаган 7 нафардан (I, II, III ўрин ғолиблари ҳамда энг юқори балл тўплаган 4 нафар) жами 14 нафар иштирокчилар хорижий давлатга таълим саёҳатига юборилади.