Ukraina prezidenti Vladimir Zelenskiy 20-avgust kuni Rossiya rahbari Vladimir Putin bilan muzokaralarni Avstriya, Shveysariya yoki Turkiyada o‘tkazishga rozi ekanini bildirdi. Bu haqda Deutsche Welle xabar berdi.
Zelenskiyga ko‘ra, u bu uchrashuvning Rossiya yoki Vengriyada bo‘lishiga qarshi. Bu haqda Ukraina rahbari Kiyevda jurnalistlar bilan uchrashuvda ma’lum qilgan.
“Bizningcha, bu adolatli bo‘ladi. Yevropaliklar ham shuni ta’kidladi – uchrashuv Yevropaning neytral davlatida bo‘lishi kerak. Chunki urush Yevropa qit’asida davom etmoqda. Men rozi ekanimni aytdim. Shveysariya yo Avstriyami? Biz rozimiz. Turkiya? Biz uchun Turkiya NATO a’zosi va Yevropaning bir qismi va bunga qarshi emasmiz. Ammo Moskvaga yo‘q deymiz. Bunday bo‘lishi mumkin emas”, dedi Ukraina rahbari.
Zelenskiy, shuningdek, Vengriya poytaxti Budapeshtda uchrashuv o‘tkazish ehtimoliga ham izoh berib, mamlakat Ukrainani Yevropa Ittifoqiga qo‘shilishini ham yoqlamasligini eslatib o‘tgan.
“To‘g‘risini aytadigan bo‘lsam, Yevropa davlatlari urush davomida Ukrainani birdek qo‘llab-quvvatlamoqda. Budapesht esa bizni qo‘llamadi. Men Viktor Orban (Vengriya bosh vaziri) siyosati Ukraina manfaatiga zid bo‘lgan demayman, ammo u bizni qo‘llab-quvvatlashga qarshi edi”.
Uchrashuv sanasi va tayyorgarlik
Zelenskiyga ko‘ra, Putin bilan uchrashuvning aniq sanani belgilash oldidan Ukraina xavfsizlik kafolatlari haqida xabardor qilinishi kerak.
“Hozir Rossiya tomonidan tashabbus bo‘lishi kerak. Ukraina hukumati 7-10 kun ichida xavfsizlik kafolatlari haqida xabardor etilishi zarur. Shundan keyingina uch tomonlama uchrashuv o‘tkazishni xohlaymiz. Mening rejam shunday edi. Tramp esa biroz boshqacharoq taklif berdi: avval ikki tomonlama, keyin uch tomonlama uchrashuv. Men darrov ikki tomonlama uchrashuvga rozi bo‘ldim. Biz tayyormiz. Lekin rossiyaliklar tayyor bo‘lmasa-chi? Bu masalani yevropaliklar ham ko‘tardi. Agar Rossiya rozi bo‘lmasa, biz AQSHdan keskin munosabat kutamiz”, deya ta’kidladi Ukraina prezidenti.
Izoh (0)