Farg‘ona viloyati Olimpiya zaxiralari kolleji bosh hisobchisi 4,3 milliard so‘mni onlayn-qimor o‘yinlariga sarflab yuborgani aniqlandi, deb xabar beradi Bosh prokuratura matbuot xizmati.
Ma’lum qilinishicha, Farg‘ona viloyati Olimpiya zaxiralari kolleji bosh hisobchisi egallab turgan lavozimidan g‘arazli maqsadlarda foydalanib, 2019—2021-yillar davomida o‘ziga asossiz ravishda jami 4 milliard so‘m ish haqi va ustama yozib olgan.
Shuningdek, u kollej o‘qituvchilari nomiga bank plastik kartalari ochib, ularga 310 million so‘m budjet mablag‘larini bildirmasdan o‘tkazib olgan. Bosh hisobchi talon-toroj qilgan jami 4,3 milliard so‘m mablag‘larni internet tarmog‘i orqali qimor o‘yinlariga tikib, sarf qilgani aniqlangan.
Holat yuzasidan bosh hisobchi va boshqalarga nisbatan Jinoyat kodeksining 167 (o‘zlashtirish yoki rastrata yo‘li bilan talon-toroj qilish) va 209 (mansab soxtakorligi) moddalari bilan jinoyat ishi qo‘zg‘atilgan.
Gumonlanuvchiga nisbatan qamoqqa olish ehtiyot chorasi qo‘llangan. Tergov davom etmoqda.
Eslatib o‘tamiz, 2021-yilda qarzga olgan 57 million so‘mni totalizatorda yutqazib qo‘ygan FarDU o‘qituvchisi qabristonda o‘zini osib qo‘ygandi.
Izoh (0)