Saudiya Arabistonidagi Xorijiy fuqarolarni vaqtincha saqlash markazda bo‘lgan fuqaro O‘zbekistonga qaytarildi. Bu haqda “Dunyo” xabar berdi.

Keltirilishicha, O‘zbekiston elchixonasi ko‘magida Saudiya Arabistonidagi Xorijiy fuqarolarni vaqtincha saqlash markazlaridan birida bo‘lgan o‘zbekistonlik N.H. vatanga qaytarildi. U joriy yilning 25-iyun kuni Bahrayndan turistik viza asosida Ar-Riyoz shahriga kelgan va 8-iyul kuni “Al-Masif” departamenti tomonidan qo‘lga olingan.
Markaz rahbariyati bilan olib borilgan muzokaralar natijasida uni O‘zbekistonga qaytarish to‘g‘risida kelishuvga erishildi. Shundan so‘ng, xorijga chiqish pasporti yo‘qolgani sababli unga elchixona tomonidan O‘zbekistonga qaytish guvohnomasi rasmiylashtirilib berildi.
Uning O‘zbekistonga qaytishi uchun barcha aviachipta xarajatlari Saudiya Arabistoni tomonidan qoplandi.
O‘zbekistonda joriy yil 30-iyuldan 30-avgustgacha “Vatanga qaytarish” xayriya gumanitar aksiyasi amalga oshirilmoqda. Aksiya doirasida Saudiya Arabistonida oilaviy zo‘ravonlik qurboni bo‘lgan o‘zbekistonlik vatanga qaytarilgan edi.
“Vatanga qaytarish” xayriya aksiyasidan chet ellarda og‘ir sharoitda qolgan o‘zbekistonliklarni vatanga qaytarish maqsad qilingan. Rejaga asosan, avvalo Turkiya, Rossiya, Qozog‘iston, BAA, Saudiya Arabistoni, Hindiston, AQSH va Koreyadagi deportatsiya markazlarida bo‘lib turgan ayollar va bolalar vatanga qaytariladi.
Xorijda og‘ir moliyaviy ahvolda qolgan fuqarolar konsullik muassasalari yoki Migratsiya agentligi vakolatxonalari xulosasi asosida O‘zbekistonga olib kelinadi. Vatanga qaytarilgan fuqarolarni samarali reintegratsiya qilish bo‘yicha amaliy choralar ko‘riladi. Ular davlat tomonidan taqdim etilayotgan maqsadli subsidiyalar, imtiyozli kreditlar, tadbirkorlik va o‘zini o‘zi band qilish dasturlari orqali qo‘llab-quvvatlanadi.
Fuqarolarni qaytarish bilan bog‘liq transport xarajatlari Migratsiya jamg‘armasi mablag‘lari hisobidan qoplanadi.
Izoh (0)