Transport aloqalari, yashil iqtisodiyot: Emomali Rahmon IHT sammitida qanday takliflar berdi?

Tojikiston prezidenti Emomali Rahmon Iqtisodiy hamkorlik tashkiloti (IHT) sammitida so‘zlagan nutqida bir qator tashabbuslarni ilgari surdi.

U o‘z nutqida jahon iqtisodiyotidagi ijobiy tendensiyalarni qayd etib, IHT umumiy yalpi ichki mahsuloti ikki trillion dollardan oshib borayotgani va o‘sishda davom etayotganini ta’kidladi. Siyosatchi ushbu ijobiy tendensiyalarga qaramay, tashkilotga aʼzo mamlakatlar o‘rtasidagi iqtisodiy hamkorlik salohiyatining salmoqli qismi hamon foydalanilmayotganini eslatdi.

Shu nuqtayi nazardan, u iqtisodiyotning turli tarmoqlarida hamkorlikni faollashtirish, raqobatbardosh mahsulotlar ishlab chiqarishni ko‘paytirish, mintaqalararo va hududlararo transport aloqalarini mustahkamlash, qayta tiklanadigan energiya manbalaridan foydalangan holda yashil iqtisodiyotni rivojlantirish kabi qator tashabbuslarni ilgari surdi.

Shuningdek, Emomali Rahmon IHT mintaqasida transport infratuzilmasini yaratishga eʼtibor qaratdi va Tojikiston Sharq-G‘arbiy, Markaziy Osiyo-Janubiy Osiyo yo‘nalishidagi sohani rivojlantirishga salmoqli hissa qo‘shish niyatini bildirdi.

U tomonlarni qiziqtirgan barcha sohalarda hamkorlik holati va istiqbollarini har tomonlama tahlil qilishni taklif qildi.