Umidsiz kasallar, ta’sirchan hayvonlar, yetim bolalar yoki javobsiz sevgi haqidagi filmlarni tomosha qilayotganda albatta yig‘lagansiz — bu janr sxemalari bo‘lib, ularda yig‘loqi epizodlar va fojiali sahnalar bo‘ladi. Bunday filmlardan terapiya sifatida foydalanish mumkin — ular yig‘lashga majbur qiladi, demak, bu orqali ancha yengillashasiz.
“Hayot pulti”
Ko‘plab muvaffaqiyatli dramatik filmlarga ega bo‘lishiga qaramay, Adam Sendler millionlab tomoshabinlar nazarida hamon eng past darajadagi komediya aktyori bo‘lib qolmoqda. Uning filmlaridagi noo‘rin hazillari barcha yaxshi tomonlarni yo‘qqa chiqaradi. O‘z hayotini sehrli qurilma yordamida boshqara oladigan qahramon haqidagi “Hayot pulti” komediyasida Sendler qahramoni xuddi sakkiz yoshli boladek pult yordamida jinnilik qiladi, ammo keyinchalik qurilma unga hayotidagi eng yaxshi daqiqalarni qadrlashni o‘rgatadi va Adam bilan birga hayotni sevishni boshlaymiz. Endi film Frank Kapraning “Bu ajoyib hayot” filmiga o‘xshab ketadi — ko‘z yoshlarni to‘xtatib bo‘lmaydi.
“Kelajakdan kelgan yigit”
“Haqiqiy muhabbat” va “Brijet Jonsning kundaligi” muallifi Richard Kyortisning “Kelajakdan kelgan yigit” romantik komediyasi shunchaki fantastika qo‘shilgan yana bir sevgi hikoyasidir. Bosh qahramon oilasidagi erkaklar qandaydir xatolarni tuzatish uchun o‘tmishga qaytish qobiliyatiga ega ekanligini bilib qoladi va orzusidagi qiz bilan munosabat o‘rnatish uchun bundan foydalanadi. Afsuski, yigit hamma narsani yaxshi tomonga o‘zgartirish mumkin emasligini, ba’zi narsalarni esa umuman tuzatib bo‘lmasligini tushunadi. Qahramonning otasi bilan vidolashuvi yuragini tilka-pora qiladi.
“Quyon Jojo”
“Quyon Jojo” tragikomediyasi Tayka Vayiti haqidagi tasavvuringizni butunlay o‘zgartirib yuborishi mumkin — u dramani ham yaxshi biladi. Darvoqe, avval film sizni aldaydi, chunki muallif 1930-yillarning oxirida aqldan ozgan Germaniyani masxara qiladi — targ‘ibot nemislarning miyasini shu qadar ishdan chiqarganki, ular yaxshilik va yomonlikni ajrata olmay qolishgan. Film bosh qahramoni, Reyxning yosh askari fyurerning har bir so‘ziga ishonadi, to bir kun kelib maydonda sirtmoqqa osilgan onasini ko‘rmaguncha. Yurakni yorib yuboradigan burilish.
“Pusanga ketayotgan poyezd”
Janubiy Koreyaning zombi-apokalipsisi “Pusanga ketayotgan poyezd” janr qonunlariga ko‘ra, bir soniya ham e’tiboringizni susaytirmaydi. Bu yerdagi qonunlar esa oddiy — agar hokimiyat o‘liklar qo‘liga o‘tgan bo‘lsa, tiriklar o‘lishi kerak. Faqat har xil o‘lish mumkin. Yolg‘iz ota Sok U qizining hayotini himoya qilar ekan, dahshat va harakatning shunday girdobiga tushib qoladiki, na qahramon va na tomoshabinlarga mualliflar nafas olish uchun bir soniya ham vaqt berishmaydi. Bosh qahramon hayotining so‘nggi soniyalari shunchalik og‘riqli bo‘ladi — u virus bilan zararlangan, bolasi bilan o‘tkazgan lahzalarni eslaydi va hayoti bekorga o‘tmaganligini tushunadi.
“Interstellar”
Kristofer Nolan kartinasida haqiqatan ham ta’sirchan olam manzaralari, jo‘shqin qahramonlik va maqsad yo‘lida fizikaning qarshiligini yengish uchun qahramonlarni mushtlarini kuchliroq qisishga majbur qiladigan aqlbovar qilmas tryuklar yetarli. Ammo filmda yana ikkita epizod borki, ularga ko‘z yoshisiz qarab bo‘lmaydi. Birinchisi — Kuperning katta yoshdagi bolalar unga murojaat qilgan yozuvlarni ko‘rishi. Ikkinchisi — otasini koinotga yuborayotgan keksa Merfining yakuniy monologi.
“O‘zga sayyoradan tashrif”
Yerliklarning o‘zga sayyoralik kelgindilar bilan aloqasining tarixi odatda makkorona hujum, aqlbovar qilmaydigan vayronagarchiliklar, insoniyat vakillarini shafqatsiz jazolash va kosmosdan kelgan mehmonlarning qarshiligini yengish atrofida aylanadi. Deni Vilnyovning mazkur filmi mutlaqo kinoga o‘xshamaydi. Bu yerda o‘zga sayyoraliklarning g‘alati kemalaridan tahdid keladi, lekin u keng ko‘lamli terrorga aylanmaydi, kelgindilarning ko‘rinishi qo‘rqinchli, lekin ular birinchi bo‘lib hujum qilishmaydi, mehmonlarning qurollari bor, lekin ular gaplashishni afzal ko‘rishadi. Ushbu muloqot fonida tilshunos qahramon vafot etgan qizi haqidagi tasavvurlarni boshdan kechiradi — tomshabin buni xotiralar deb o‘ylaydi, ammo oxirida ayol o‘z kelajagini ko‘rganligi ma’lum bo‘ladi. Ko‘radi-yu, baribir ona bo‘lishga qaror qiladi.
“Logan”
“Logan”da o‘z “qizini” himoya qilayotgan keksa, o‘lmas jangchi tarixidan biror narsa kutasiz, lekin bunday yakun xayolingizga ham kelmaydi. Tomoshabin filmning yarmigacha yuragini hovuchlab ko‘radigan film, so‘nggi qurbonlik va qizning o‘z xaloskori bilan xayrlashuvi — qalbni o‘rtaydigan kadrlar. Aynan shu joyiga kelib, ho‘ngrab yig‘lamagan odam bo‘lmasa kerak.
Izoh (0)